一襲純粉藍色嘅綵衣，馬迷一時間未必會想得起係邊位馬主嘅專有綵衣，但事實上，呢位馬主喺澳門養過唔少馬，後來轉來香港養馬，初期梗係賊佬試沙煲，只係養一隻馬，呢隻就係「興爾」，「興爾」嘅馬主係港澳知名馬主鄧興強嘅公子，其父親鄧興強喺澳門養馬多年，且有唔少係贏過大賽。愛兒獲抽中養馬籤後，今季即用近千萬嘅價錢購入「興爾」，並對準打吡大賽進軍，呢隻馬嘅引入，蘇兆輝亦有俾過意見，因為喺法國出賽時，蘇兆輝曾贏過呢隻馬，並認為呢隻馬係匹前途無可限量嘅馬，但嚟香港後因久久未能適應水土關係，結果未有足夠分數跑今屆打吡大賽。
練馬師蘇保羅唯有退而求其次，一直順其自然讓牠適應香港作賽環境，二來評分亦由嚟港時二班嘅八十六分，一直調減至六十五分，變成一匹三班馬。雖然評分調到一個有利水平 但練馬師仍四處尋找適合呢隻馬發揮嘅路程求取頭馬，直至最近四仗嘗試向谷草一哩進軍，果真係呢隻馬最有穩定水準發揮嘅路程，喺呢四戰之中，呢隻馬共取得兩亞一季一殿成績，儘管仍未能夠打開在港勝利大門，卻已有一點安慰，谷草一哩無疑係呢隻馬目前最有威脅嘅路程。
早前呢四仗谷草一哩所用嘅搏殺騎師，計有蘇兆輝及郭能，尤其係郭能，最近三仗都係由佢披甲，雖全入三甲，卻只得一個近字，尚未能贏得頭馬，於是馬主父親力邀雷神為呢隻馬披甲，雷神知道呢場沒有蔡廄馬列陣，也好爽快咁一口應承，事關兩人早已喺澳門結賓主緣，因為喺莫雷拉未嚟香港當公司騎師時，佢喺新加坡出賽，鄧興強就邀請過莫雷拉替佢名下嘅「興圖」爭奪二○一六年嘅澳門打吡，結果順利勝出，所以今次「興爾」再搵雷神幫手，肯定會搏老命。