上周末郭能跑完頭場「依斯堅」後因脫水關係，餘下坐騎要換人。事實上，一般歐洲騎師對亞洲氣候都非常抗拒，現時郭能年紀亦唔輕，在酷熱天氣跑馬的確係蝕底多少，所以此類歐洲騎師跑夜賽信心會高好多。好似郭能喺五月一日嘅夜賽，騎五隻馬成績係兩冠兩亞一季兼奪得當晚騎師王，當晚夜賽天氣稍涼，好啱郭能喺陣上打硬仗。今次夜賽郭能復出，晚間氣溫熱極有個譜，屆時佢胯下嘅實力坐騎，可寄望有穩定水準演出，好似喺第五場四班跑一哩嘅「明月光」，再配郭能，希望贏得季內首場勝仗，呢一隻屬尺寸型一哩馬，三班爭勝分量不足，降落四班又因長期負重關係，要贏馬就要靠鞍上人嘅留放工夫，所以迄今喺四班跑一哩，有人計過數。夾得最好嘅騎師就係郭能，至今佢喺四班夥拍過「明月光」六次，成績係一冠兩亞兩季一殿，即係講最差一仗都跑第四名。上場隻馬喺同程跑得第三名，當晚喺五月一日，郭能奪得騎師王除贏「大聚會」外，仲替方廄嘅「精彩輝煌」贏馬，睇來「明月光」今季要贏馬，真係要配番郭能至得，畢竟上仗喺呢個路程負頂磅輸俾「君子承諾」同「活力勇士」，今次後兩駒依然同場，但形勢就唔同，「君子承諾」贏馬後加多七磅跑，「活力勇士」經常得個準字，屬匹易位難贏嘅馬，加上今次由潘頓換上黃俊，相反「明月光」跑完上仗仲減咗一磅，鞍上人依然係郭能，種種有利條件，相信呢隻馬好有機會收復前失。