■ 黃台仰被鬧「無義氣」。 fb截圖在德國政府默許下，美國、英國傳媒近日高調報道「本土民主前線」前召集人黃台仰（偉哥仰）、成員李東昇原來已獲德國政府提供「難民庇護」，仲順勢用佢嚟踩香港、抹黑《逃犯條例》的修訂，但呢條橋似乎連激進反對派自己友都唔受。呢兩日網上一大批反對派支持者鬧爆偉哥仰「冇義氣」、「懦夫」，丟低坐緊監嘅「獨琦（梁天琦）」去德國嘆世界，仲要連「港獨」都唔再鼓吹。睇嚟德國今鋪真係弄巧反拙。
得知黃台仰喺德國做咗「難民」，唔知點解有啲人好開心，但亦都有唔少人鬧爆呢件事。激進派中人「陳大文」就連環發文，一開始就鬧︰「黃台仰很無義氣。你老友小琦（梁天琦）坐六年，你係咪判咁多唔知，可能無乜事都唔奇，但你選擇潛逃台灣，到依（𠵱）家得到德國所謂的政治庇護，做你老友真賤，有事只會被你離棄。」
鬧黃「冇義氣」「懦夫」
「陳大文」其後又再出post，話當年旺暴其實偉哥仰「在背後是多多諗頭的」，但結果所有罪名由「獨琦」孭晒，「好啦，黃台仰大哥你依（𠵱）家就好型喇，哎喲在文明德國呵。」佢仲質疑啲人話偉哥仰贏係贏啲乜，直斥對方根本係「懦夫」。
「Akimoto Atsushi」就話：「心痛梁天琦俾黃台仰呢條×街賣×左（咗）！」「Андрей Ович」揶揄道：「（偉哥仰）叫天崎（琦）衝，自已（己）唔衝，呢D（啲）就係做指揮既（嘅）行為，好野（嘢）喎！好有大將之風囉！」
受「大愛」感染無晒火
偉哥仰喺接受外媒訪問時仲賣小強，講到自己思鄉時淚眼連連，「代價沉重」，「Wailok Leung」就質問道︰「你代價有幾沉重呀？身光頸靚，又有大學讀，又有人照顧你。同埋你可以唔走架（㗎），俾你掉（丟）低嗰個戰友梁天琦都無走啦，自己口講就做『肉碎』，實質就做『瓦全』。」「Wai Hoi Ying Cecilia」揶揄︰「學德文要花好多腦力，仲唔係代價？但點解係（喺）條街到（度）喊？偉哥食曬（晒）乎？」
唔止鬧偉哥仰，德國都被怪罪搞到偉哥仰連「『港獨』信念」都冇埋。「Andy Tang」話︰「佢（偉哥仰）呢啲叫入鄉隨俗，去得『左膠』德國，立場都要『左膠』D（啲）。」「Judy Chow」亦揶揄︰「果然醒目仔，去咗『大愛』德國，成個Tone（語氣）即刻唔同晒，冇晒啲hate speech（仇恨言論）。」「Angus Yu」仲寸︰「佢自己去德國做『蝗蟲』，仲要搶埋人哋大學學位，應該都唔好意思再鬧大陸人係『蝗蟲』。」
「Mak Chun Fan」就覺得，無論「獨琦」定偉哥仰都係嘥氣︰「梁天琦放棄武力『抗爭』，主張『和理非』；黃台仰放棄『香港獨立』，注重普世價值人權。搞咗咁大壇野（嘢），兜咗咁大個圈，最後都番（返）返去呢個咁傳統嘅立場......多麼痛的領悟。」 ■香港文匯報記者 甘瑜