明晚將舉行今季最後一次全泥賽，每逢呢個時候，大家一定會攞啲泥地數據睇吓，今季到目前為止泥地勝出率最高嘅馬房係羅富全，勝出率達26%，比起第二位嘅徐雨石高10%，後者只得16%，可想而知羅富全今季泥地嘅成績幾咁勁。換句說話，呢個倉每派四隻馬出賽，起碼有一隻勝出。呢次夜賽，羅富全都算大陣仗，八場賽事中，有七場係有份派馬列陣，值得大家注視。
講到泥戰最準，唔使講一定要睇住隻「地大大」，今季三戰泥地賽，得兩冠一亞成績，得第二嗰次，鞍上人陳嘉熙嘅發揮未理想，早段雖然唔夠「好好利高」搶，其實可以順跟，但順跟第二位後，突然見莫雷拉隻「歡樂一生」搶上，陳嘉熙用咗啲力同「歡樂一生」鬥咗陣，試圖搶喺第二位，但見對方非要攞到個第二位不可，最後退番落第三位，結果就係咁花咗少少力氣，末段狂追「好好利高」就輸咗短頭。呢一次可以話俾咗陳嘉熙一個經驗，隻馬再出依然搵番陳嘉熙騎，結果把握到馬匹性能，全程唔搶，留守四、五位之間，結果直路一衝，贏第二名馬「添好運」一位一，呢一次都算係人馬合拍嘅一戰，亦順利再替「地大大」帶來今季第二場勝利。
當然，馬房希望陳嘉熙能夠更加熟習馬性，最近一仗竟然安排喺草地千二米上陣，而鞍上人陳嘉熙似乎知道胯下坐騎實力唔夠，故初段利用本身速度搶放，拍實初出馬「德勝門」及另一匹實力馬「同樂日」，結果放到距終點前百餘米就開始腳仔軟，只能以第七名過終點。不過呢席第七名，計勝負距離只係輸俾頭馬「友瑩囍」五個馬位，表現已算合格有餘，馬房只視呢一課為大閘，真正出擊目標先至係今次三班泥地千二米，屆時再配陳嘉熙，人馬有晒合作默契，應可再溫好夢。