大摩上周末四喜臨門，頭馬數字經已增加到六十六場，至於暫時居於榜首嘅蔡約翰，上周末只憑「明駿之星」增添一勝，現時兩者只相距五場。大摩近季尾階段發動咗總攻勢，想反擒蔡神仙，當然，得唔得就係未知數，不過喺呢次泥地夜賽，假如大摩再迫近一、兩場，咁就真係好過睇戲。講真大摩今次派五駒列陣，蔡約翰就派四駒，大摩有四隻係質新馬，相反蔡約翰除「平海飛星」較質新外，其餘三件「精算閃擊」、「八心之友」及「架勢」，泥地性能雖然好，但評分冇着數，咁即係講，大摩添頭馬紀錄機會較蔡廄高，而蔡廄相信以「平海飛星」贏面最高。講到隻「好運」，呢隻馬上場在田草千六米輕鬆獲勝，如果再揀番食胡路程，連捷信心會強一啲，下次日賽有場四班田草千六米，但大摩專登安排隻馬跑泥地一哩。當然，跑泥地對「好運」屬毫無根據嘅賽程，但大家可翻查一下隻馬喺四月二十三日，由史卓豐彈課泥地千二米大閘，走位8 7 2，早段大落後，入到直路鞍上人從大外檔輕輕推送兩步，終點即撲上欲威脅該課試大閘跑第一名嘅「首飾大聖」，最後只是追剩一條頸位，屈居第二名。呢課顯示隻馬泥地性能肯定唔曳，再睇呢系同父血統喺港子嗣有「榮冠大道」、「八心之友」及「銀紙」，呢幾隻馬跑泥地戰都非常適合，大摩要跟蔡神仙抝手瓜，冇理由將隻喺田草有戰績支持嘅「好運」轉去跑泥地，擺到明今場呢隻馬係有贏馬機會。