周日煞科戰，騎練冠軍寶座花落誰家，初步已有輪廓，冠軍騎師一支獨秀係潘頓天下，至於冠軍練馬師，大摩曾經一度強勢威脅蔡神仙，但喺剛過去嘅夜賽，戰果出人意表，蔡神仙入兩粒，反觀賽前被睇好嘅大摩，僅得一場頭馬進帳，目前頭馬成績，變成蔡神仙七十六場，大摩七十四場，咁嘅形勢，去到周日終極煞科戰，大好形勢顯然仲係企喺蔡神仙呢一邊，雖然大摩只欠兩場追到跟蔡神仙平頭，但因為亞軍馬嘅數目唔夠對方多，實際要贏到冠軍，起碼要贏三場先至有得傾，所以，只要蔡神仙煞料日贏到一場嘅話，大摩就要贏四場，難度幾咁高大家可以想像，而通常每季冠軍練馬師，最後一日十居其九必有謝幕頭馬，蔡神仙一早計數，假如自己贏到冠軍，冇理由呢日冇頭馬出現凱旋門，所以大家落足精力，刨定邊隻可以助蔡神仙穩坐呢個冠軍寶座嘅實力分子，部署喺周日一戰發威。
當然，最明顯就係沙田一哩錦標千六米部署重兵嘅三匹蔡廄馬，分別係「志趣相投」、「達羅素」及「精算閃擊」，三駒之中，論到跑千六米最拿手當然係「志趣相投」，主帥亦一早揀呢隻馬作為馬房出擊主力，最妙就係馬房連「精算閃擊」亦出埋，季內獲一冠七位馬，贏馬嗰場只係喺三班取得，未達一班卡士馬，如今亦要報跑沙田一哩錦標，目的係作開路先鋒，好待真命天子臨場有個正常步速發揮，免得又被對手輪流用戰術圍攻。
「志趣相投」上賽在精英盃三級賽千四米不敵「奔雷」，前者要讓後駒八磅，加上千四米比起千六米，對「志趣相投」嚟講，角逐千六米嘅信心會較強，因為目前所得嘅四場頭馬，三場係來自千六米，僅一場係出自千四米，所以今次喺沙田一哩錦標再戰，台前幕後當然有信心可以補中。