■李珊珊先作自我介紹，分享患病過程。一度感覺窒息 自覺瀕死邊緣
香港文匯報訊（記者 李慶全）前港姐冠軍李珊珊淡出幕前，7年間幾乎絕跡沒公開露面，一直被傳患上腦癌及抑鬱症，直到今年2月珊珊為東華三院的慈善音樂會分享她進出醫院的經歷，最近她再為「精神健康基金會」拍攝短片，披露她患上的其實是驚恐症，並分享如何治癒的過程。
短片以默劇形式展示，珊珊盤坐椅子上，臉帶笑容手持寫上心聲的巨型「大字報」，逐點跟大家分享：「我係李珊珊，I have a story to tell.。2017年，我身處醫院，當時因為種種原因，第一次出現非常激烈嘅病徵，發熱、標冷汗、全身冇力、呼吸困難、不停地掙扎直至眼前一黑。嗰種令人窒息嘅感覺我直頭覺得係瀕死邊緣。經過唔同嘅檢測，專科醫生都搵唔到病因，病徵持續出現，每日都徘徊地獄又折返人間。兜過唔少冤枉路，做過唔少測試，都係搵唔到病因。」
古天樂 鄭秀文鼓勵情緒病患者
接着，她透露：「直至有一日......經轉介去見劉英傑醫生，我先知道個病係叫『驚恐症』，幸好劉醫生教曉咗我情緒病其實同傷風感冒一樣有得醫，我開始向信得過嘅朋友分享，輕描淡寫地透露我嘅狀況，就好似患咗傷風感冒一樣，No big deal！」
珊珊還表示：「然後我就只係做兩件事，準時覆診、準時食藥。加上好友們嘅關心同不離不棄，病情慢慢好轉，驚恐症嘅症狀無再發生，瀕死邊緣嘅感覺無再出現，我就知道我嘅情況受到控制。𠵱家睇返轉頭慶幸當初堅持搵病嘅根源，知道問題根源先可以搵啱解決方法。情緒病其實同普通病無分別，搵啱醫生食啱藥，病就自然會好，我選擇行出嚟同大家講我嘅故事，係希望有相同遭遇嘅朋友，又或者你身邊有相同遭遇嘅朋友，都可以分享佢哋嘅故事。」珊珊最後還舉起勝利手勢及為自己加油打氣，笑着展現自己已完全戰勝病魔。
珊珊更獲得圈中好友包括古天樂、鄭秀文、甘比、林保怡、何超蓮及崔加寶等齊齊為自己打氣，更鼓勵同路人要懂得向身邊人道出情緒問題，病向淺中醫，社會更不應歧視及標籤情緒病患者。而珊珊明天亦會在基金會的Facebook做直播分享。
