■（左起）吳肇軒與廖子妤及胡子彤於新劇合作愉快。香港文匯報訊 （記者 梁靜儀）胡子彤、吳肇軒、廖子妤及余香凝等，昨日於九龍灣為劇集《地產仔》拍攝外景，劇集講述飾演地產經紀的胡子彤、吳肇軒於豪宅外為搶客大打出手的場面，二人演出時七情上面。近日與香港游泳代表歐鎧淳結束三年情的胡子彤，昨日首度公開露面，談到舊愛的新戀情時就表示希望對方開心，而其好友吳肇軒就趁機表白，自爆好鍾意胡子彤。
胡子彤表示劇集尚有幾日便煞科，而農曆新年就會留港與家人度歲。剛甩拖回復單身的他，透露都想去旅行。問到是否去散心？他說：「唔係，希望有少少Break畀自己沉澱吓，嚟緊會有新計劃，會唱電影歌曲，今次歌詞都係我寫，用咗兩星期填詞，有機會都想再唱，之後都會學唱歌同練結他。」談到分手後的心情，子彤初時也不欲多談，只說：「過咗去啦。（你用莫文蔚嘅歌憑歌寄意？）唔係，我好鍾意莫文蔚，佢係偶像，鍾意聽佢啲歌，見到都唔敢同佢打招呼。（分手對你好大打擊？）過咗去嘅就展望將來。」
廖子妤易被融化
談到盛傳歐鎧淳新戀情的對象是女仔，問到可會祝福對方及可認識其新歡？胡子彤說：「都知佢要準備比賽，希望佢有好成績，亦希望佢開心。（仲有冇聯絡？）未係適合時候，遲啲先再算。」問到是否未有心情接受新戀情？子彤表示望有桃花人緣，但姻緣就會隨緣。那是否已放下舊情？他就沒有正面回答，只說：「再講啦。（即係未放得低？）可能突然出去食飯見到個女仔會鍾意呢，現階段專注工作先。」
吳肇軒表示劇中會飾演廖子妤的下屬，二人最後會有曖昧擦出感情線。而一身男性打扮的廖子妤表示劇中叫「魚哥」，是個曾經受傷好想保護自己的女仔，而這個保護罩對很容易受傷的她來說好舒適。吳肇軒指她一埋位就好像什麼都不怕，但一Cut機就變回小女生，正如劇中一句對白「係咪要用愛同溫柔融化呢條冰鮮魚 ？」問到現實中可融化到子妤？他笑說：「佢好易融化。（咁有冇揀你？）梗係冇啦，我暫時未有呢個福氣。」子妤就承認自己好易被融化，只要肯氹她，她就肯笑。問到她不考慮肇軒是否因為已有男友，子妤欲言又止，及後在追問下才承認與男友已分手一段時間。她又笑指不考慮吳肇軒是因大家多次合作已很熟絡，而且有時覺得他很煩。
問到吳肇軒可有安慰好友胡子彤，他指對方好堅強，一入劇組就投入角色，當然做兄弟的，對方有任何需要都會幫助。問到是否幫他結識女仔？他否認道：「唔係呢啲，佢𠵱家都專注工作，暫時未有呢個要求。（有冇女性朋友介紹畀佢？）我覺得胡子彤太好喇，我要搵一個真係好好嘅介紹畀佢，我好鍾意佢，如果我轉咗（性取向）會第一個揀佢。」