近期彭國年火速泊到告東尼碼頭，上場在谷草一哩初次登場由何澤堯爆半冷隻「孖寶兄弟」，今次都俾埋佢騎，假如彭國年騎得好，相信好大機會交俾呢位法國好手跑埋餘下三關四歲系列賽事。
彭國年只識講法文，所以並唔能夠直接與大部分練馬師溝通，現時練馬師當中，除告東尼識法文外，高伯新亦懂，皆因佢喺法國開過一輪倉，英文與法文都難唔到呢位英籍練馬師。大家仲記唔記得，巴度今次來港再度客串開齋馬是出自那個馬房，答案就係高伯新，皆因巴度亦是法國仔一名，要索取支持，當然搵啲傾到偈的馬房，高伯新法國開倉一段日子，巴度搵支持向高伯新開聲，高伯新又點會托手肘，結果今季巴度客串期第一場頭馬就係高廄嘅「獨角寶寶」。今次日賽，巴度又獲得高伯新支持，就係近期降回四班上陣的「快利寶」，講真呢隻馬跑谷草一哩就話有根有據，但跑泥地經驗就唔多，在港上陣三季，跑過一次泥地千二米，得第七名輸三個身位俾頭馬「勇冠多」，相隔季多兩季，馬房才替呢隻馬部署第二次泥地賽，今次揀一哩角逐，路程性能應該更合發揮，當然，大家都好懷疑呢隻馬泥地性能，有冇其他同場列陣分子咁犀利，呢個問題從巴度決定揀呢隻馬，就證明到「快利寶」泥地性能一定唔錯。事關同場之中，上次由佢披甲隻「紅粉彩影」，如非該場途中意外多多，搞到後上不及，「八太子」一定贏唔到「紅粉彩影」，後者今次韋達再安排牠出戰泥地一哩，如果巴度再騎，相信好大機會補中，但巴度改騎同父嘅「快利寶」執韁，大家可以細心睇睇，「快利寶」與「紅粉彩影」屬同父馬，故泥地性能可以話必合，而佢嘅母線更屬美國馬，巴度揀得佢上陣，而高伯新又肯安排隻馬出戰泥地賽，大家不妨信佢哋捧吓場。