泛暴派為咗繼續用政治手段禍港，呢排狂搞新工會去玩罷工。其中，「香港保險仝人職工會」日前就通過動議，去信要求保險公司叫特區政府「全面封關」，有工會中人仲話如果唔回應，或者會差別對待港人同內地人嘅保險單喎。咁冇職業操守嘅說話都講得出，全國政協副主席梁振英就開post叫大家搵下已被開名嘅副主席阿Sam喺邊間公司做，唔少人當然支持。不過，個工會第二日就澄清話啲威脅言論係「個別會員意見」，唔係正式表決內容喎，佢割席都割得好快吓。
梁振英噚日引用《立場新聞》報道，內容提及工會副主席阿Sam動議去信要求保險公司「敦促」政府「全面封關」等，獲大比數通過。有工會中人仲話，如果保險公司冇正面回應，會考慮搞「工業行動」，包括優先處理港人嘅保險單，「到時唔知點解內地啲單會落到最底，大家都Claim（報銷）左（咗）香港單先。」
梁振英補充，當日職工盟秘書長李卓人亦有出席，仲請網民搵下個阿Sam係邊間公司，佢會喺內地廣而告之咁話。
網民：煽罷工可否釘牌？
唔少網民都睇唔過眼個工會諗住差別對待內地客戶。「Ju Ju Hung」和應道：「睇佢係邊間保險公司，傳去內地佢都唔使旨意喺保險界立足，煽動罷工可唔可以釘佢牌？」
「Ka Hung Ching」就話︰「『優先處理港人的申請及訂單』，這會是什麼規條？其實呢個『香港保險仝人職工會』，有冇法律顧問意見架（㗎）？」
有網民亦覺得如果保險公司發現自己經紀諗住咁做，一定即炒。
呢個工會即日就出post回應，話《立場》個報道只係「個別會員意見分享」新聞，唔係正式表決內容喎，即係割席唔認數啦！咁又係嘅，諗住搞工業行動前真係要諗清楚有冇違反操守啊。 ■香港文匯報記者 郭家好