朱立威將口罩入落碧山樓全部住戶嘅信箱。 朱立威fb圖片講就天下無敵，做就冇心冇力，講緊嘅就係南區區議員陳衍沖。石排灣碧山樓近日有住戶確診新冠肺炎，身為區議員嘅陳就嗱嗱臨派口罩畀街坊刷存在感，仲即刻喺facebook開post自爆，話只係派咗口罩畀確診者嗰層嘅住戶，結果邀功唔成仲俾網民恥笑「慳家」。陳聽完就發晦氣咁死撐，話自己唔會貼錢買嘢換鐵票喎，有網民聽完就火滾：「原來收咗你個口罩就要投票畀你？唔好侮辱選民喎！」
陳辱街坊選票換口罩
碧山樓上月28日有住戶確診，該區前區議員朱立威翌日就即刻將口罩入落碧山樓全部住戶嘅信箱，希望盡量幫吓街坊。點知30日先去派口罩畀同一層住戶咁多嘅陳衍沖就葡萄人哋又快又齊備，開post語氣極酸咁話，講到貼錢買嘢一定唔夠有人磅水嗰邊多，佢就唔會用（??）種方式買鐵票喎。咦？前任區議員做得好過現任，難怪一地玻璃碎啦！
朱立威睇完就??晒頭開post話，明明區議會早前先批咗50萬撥款，由民政處買完口罩再分畀區議員派，估唔到陳唔止創下只派口罩畀一層住戶嘅「政績」，仲將派口罩歪曲成買票。佢又提醒陳︰「居民唔係傻嘅，如果用幾個口罩就可以買鐵票，你都未免太過侮辱石漁嘅街坊！」
唔少網民都唔明陳嘅邏輯，「Taylor Chan」滿頭問號：「近排陳議員同隔離（籬）區啲議員都有區議會啲口罩派喎，咁陳議員係咪認為自己同佢哋都用區議會物資買鐵票？」「Carl ko」就問：「我有冇睇錯，當區區議員淨係派得一層居民嘅口罩？自己做唔好又要抹黑人哋，咁算唔算『政治打壓』嘅一種？」
「Doris Poon」就恍然大悟：「無喇喇俾陳議員侮辱咗都唔知添（??）！」「stella wong」就笑言：「自己做唔到，又要葡萄人地（哋）做得到，陳議員都幾玻璃心wo（喎）！」「Florence Lee」一語道破：「口號儀（議）員的伎倆：自己叫完當做野（嘢），人哋做野（嘢）當無野（嘢）。」
■香港文匯報記者 鄭治祖