■現實生活中，苟姑娘對着老公亦有「惡」的一面。香港文匯報訊（記者 李思穎）苟芸慧（苟姑娘）自2018年下嫁老公陸漢洋後，過着幸福少奶奶生活，近日無綫熱播中劇集《飛虎之雷霆極戰》便是苟姑娘婚後的首部港產作品，劇中她飾演馬國明（馬明）太太「殷婷」，演繹「惡妻」一角，大抵太投入角色，苟姑娘不自覺把「惡」的一面帶回家，老公陸漢洋首當其衝亦照單全收，盡顯「愛」的一面！
苟姑娘相隔4年重返香港熒幕幫娘家拍劇，今次「復出」，她大叫緊張，兼特別感觸：「因為我個人較念舊，當見返電視城化妝師、工作人員、攝影師，好感動，勾起不少開心回憶。」
劇中，苟姑娘飾演一名惹笑「惡妻」，有不少「鬧爆」老公馬明的鏡頭，為緊湊的飛虎劇情帶來輕鬆的喘息位，苟姑娘表示：「今次拍攝完全唔辛苦，可能時間安排得好，而且同馬明對手戲都以輕鬆為主，唔使打、唔使喊；記得我同馬明開工嘅第一場戲，就要發脾氣鬧佢，嗰場戲仲要喺街巿度拍，好多人望住，所以都幾大挑戰。」她首次跟馬明合作已經讚不絕口：「馬明好有耐性，拍攝期間，有時自己狀態唔好都會忟憎，但馬明就好有耐性，對住我笑吓，叫我唔使咁緊張，安慰我。戲中我哋有個囡囡，埋位之前，我見到馬明會主動同個小朋友玩、傾偈，感覺好有爸爸feel，亦令我好安心同佢工作。」
唔覺意將惡樣帶返家
提到演「惡妻」，苟姑娘指現實生活中，她對着老公亦有「惡」的一面，她說：「佢（老公）有反映過我拍呢套劇時，個人特別惡，可能我唔覺意將角色嘅性格帶埋返屋企，但我覺得佢應該接受到，喺鬧嘅過程，表達到我嘅想法，我估佢都鍾意嘅。」
《飛虎之雷霆極戰》是苟姑娘婚後首部作品，在拍攝期間老公陸漢洋可有到場探班？苟姑娘沒好氣表示：「試過一次，佢話咁啱喺附近工作，之後就『愛的迫降』咁空降拍攝現場。我返到屋企同佢反映，唔好再喺我工作位置出現，咁樣會令我分心，好似成日有對眼望住我咁，好唔自在。不過佢就話，嗰次係嚟睇馬明，仲話馬明係佢偶像。」
