■ 黃日華與女兒抵達殯儀館。堅強面對喪妻之痛 偕愛女互扶持
香港文匯報訊（記者 梁靜儀）黃日華（華哥）的太太梁潔華，於5月26日因器官衰竭離世，終年59歲，飽受喪妻之痛的華哥，昨午偕同獨生女黃芷晴到紅磡世界殯儀館為亡妻辦理身後事，戴上眼鏡及口罩的華哥一臉憔悴雙眼通紅 ，而芷晴則戴上漁夫帽及口罩全程低頭及不時飲泣，華哥表示與女兒在這段時間會互相扶持及堅強面對，而梁潔華的喪禮將於6月13日設靈，翌日出殯。
昨日下午華哥與女兒等一行四人抵達殯儀館，華哥和芷晴亦有停低接受傳媒拍照及訪問，華哥先跟大家說：「大家有心、有心，唔該。」
芷晴前晚於社交平台發文表達喪母心情，並以「勇敢的女皇」稱呼媽咪，她表示會帶着媽咪那份堅強，好好生活下去，並希望媽咪能「回來」當她的女兒。問芷晴在社交平台抒發心情後，心情有否好些？她說：「好好多，因咁多年都冇講。（有冇夢見到媽咪？）暫時未，但屋企客廳出現一隻飛蛾，好似識聽我同爸爸講嘢。」問到這幾天是否陪着父親時，華哥代為回答：「呢兩日都有陪住我，喺呢段時間要互相扶持、照顧，我哋兩個都OK，堅強，大家放心。（太太有何遺願？）都係叫我睇住個女，阿女睇住我，照顧佢阿媽同啲動物，叫我哋要乖啲。（呢段時間會唔會停工？）不嬲都停工，再加上疫情，做咗應該做嘅嘢先，暫時辦好太太身後事先，未有詳細復工打算。（太太有冇講過身後事點辦？）佢有同我講過，太太有立遺囑，並叫我喺幾時拎出嚟睇，但未有時間搞。」
芷晴被問到是否想來生媽咪做其女兒時，她說：「係呀，爸爸話媽咪呢一生咁辛苦照顧我，為咗照顧我放棄自己事業，希望我體會佢嘅角色。」問到華哥現時的心情如何？他說：「我OK，因為呢件事唔係好突然發生，都有幾年時間畀我哋慢慢適應，去接受呢個事實，我哋父女都知道呢一日始終都會來臨，呢3年時間畀我哋適應、坦然同堅強去面對。」華哥又稱讚太太生前不論在事業、照顧家庭、動物都很叻，做人都好堅強，永不放棄，不會向困難屈服，無論這幾年如何辛苦，大家見到都心痛，但她沒有放棄過，一定堅持到底，希望可以打贏場仗，克服一關又一關，都是想給人帶出不要放棄生命，生命真的好重要這訊息。
亡妻遺憾未見愛女出嫁
問到太太在最後階段是否很辛苦？華哥說：「唔會喇，可能彌留期間器官衰竭，痛苦已過晒，佢走得好舒服，我哋同佢講嘢，感覺到佢係笑住走。（太太有何遺憾？）佢始終都擔心個女仲未嫁，又好擔心佢媽咪，我叫佢放心，芷晴大個女，唔使我照顧佢，個女照顧返我，同埋一定會照顧佢阿媽。（經濟方面有冇問題？）冇問題，大家放心，我同個女一齊住。」說罷對住女兒說：「希望以後日子阿女睇住我。」
芷晴又透露已挑選了媽咪的遺照，她說：「媽咪有病後唔鍾意影相，我睇返手機同媽咪呢4、5年只得4、5張合照，上年母親節媽咪肯打扮同我哋出去食飯、同我影相，我好開心，有張相我同佢影，佢戴住粒石，上面有健康兩個字，我揀呢張相，希望佢可以帶住健康咁走，而壽衣就未清楚。」華哥表示喪禮儀式會以香港創價學會佛教儀式舉行，遺體應該會火化。
兩父女在殯儀館逗留了3個多小時後離開，華哥透露太太的喪禮將於6月13日設靈，翌日出殯，安葬地點則未定，靈堂佈置會以清淡為主，陪葬品要回家再挑選。問到喪禮會否因疫情而控制人數？華哥表示疫情環境控制不到，但都會通知所有親友，因很多親友都很有心，想出席喪禮見最後一面。