早前潘頓接受訪問表示，他的支持度唔夠莫雷拉，恐怕爭取冠軍會遇障礙。確實近期潘頓坐騎經常唔滿額，相反莫雷拉幾乎每次都爆滿，雖量不及雷神，但從質而言，潘頓就優勝過雷神，所以奪冠機會依然較高，加上雷神仲要停賽一日，論形勢潘頓登上騎師冠軍寶座，比起姚本輝坐上練馬師冠軍寶座機會更高。潘頓可能因體重關係要節食，體能自有一定影響，所以在選擇坐騎就要精挑細選，在某些場合，他揀了一些令人摸不着頭腦的馬，大家便要小心提防，當然這可結合臨場燈神的動態，假如飛數硬淨，也不妨信任潘頓的挑選。今次他為鄭俊偉馬房披甲的三班馬「家樂飛駒」，此駒只是跑過兩場，均是田草千四米，初出由楊明綸大敗十七個身位，翌仗轉薛恩披甲，雖然只得第七名，但輸給頭馬「飈驥」只是兩位一，從落敗距離上，這駒已有唔少進步，再看該場的頭兩名馬「飈驥」及「繽紛遊戲」，均是由潘頓騎過，後者上仗由潘頓跑得第二名，前者開齋頭馬便是由潘頓取得，因此，「家樂飛駒」這仗得第七名，其實在潘頓心目中已有數。潘頓肯為這匹暫時未有過表現的馬披甲，似乎已看好牠今次跑泥地一哩的爭勝機會，因為要揀實力馬騎，潘頓在同場中大可向沈廄索騎「八太子」，這駒跑泥地一哩經常具有威脅性，當然，論實力這駒現時評分跑三班賽是無上風可言，既然潘頓睇得起「家樂飛駒」初戰泥地一哩是有爭霸分量，大家便不妨留意吓。