■高海寧近年逐漸靠演技上位。因負面報道陷抑鬱 靠師奶「點醒」
香港文匯報訊（記者 梁靜儀）入行十二年的高海寧（高Ling），近年升呢為女一，主演的劇集《迷網》、《殺手》及《反黑路人甲》近日相繼播出，備受力捧程度可見一斑。公眾人物風光背後，往往承受的壓力都更大，高Ling於訪問中自爆因受負面新聞困擾一度患上情緒病，幸獲一班師奶朋友開解才想通。
INFO
場地提供：Pier 1929@灣仔碼頭
造型：wwchezw
化妝：諺瞳小白(littlewhite_makeup)
髮型：Zap Tang (Essensuals Toni & Guy Hair Salon)
高Ling日前接受香港文匯報專訪，談到近日有份演出的劇集一部接一部播出，高Ling謙稱不覺得自己走紅，只是之前拍落的劇集一次過播出，但也承認很開心公司給予不同的演出機會，像《迷網》中Vincy的角色是看重愛情但性格柔弱的女仔，《殺手》中的森森剛好相反，是理智型兼有個性，有機會扮演不同性格的角色，高Ling大呼好玩，而觀眾的反應更帶給她很大滿足感：「之前森森嘅角色好多人讚，有觀眾仲問我劇中啲衫、耳環係唔係出私伙，因為好靚，甚至有人問我頭髮係染邊一隻色、唇膏係幾多號顏色。」
在《反黑路人甲》中，高Ling飾演自信、刁蠻任性、不顧別人感受、痴情、表裏不一的女明星莊明麗，與石修飾演的富商有感情線，後來被對方封殺而令事業陷入低潮，才發覺身邊的癡情忠心粉絲張細倫（王浩信飾演）是真心對她好，明白何謂愛及學識對一個人好。
問到角色性格可有她的影子？高Ling笑着否認：「自己唔係咁，我冇莊明麗咁刁蠻任性，唯一相似係可愛。至於話莊明麗好有架子同貪慕虛榮，佢其實係想掩飾內心弱小同簡單的心靈，而佢喺呢個圈子想得到更好嘅係好正常，人唔可以只得好的性格，佢同時有黑暗面特徵，先可以令到角色更立體，我覺得莊明麗夠直接又可愛，連監製都話估唔到我演出來係咁可愛。」
曾匿廁所爆喊
2008年參選港姐入行的高Ling，因身材驕人初入行時被封為「新一代咪神」，自此被標籤為性感女星，高Ling高呼要為公司及自己平反：「我都冇做過好多好性感的角色，純粹係大家對我嘅定形象，我一直冇刻意性感，阿媽生成（身材）都冇辦法。以前唔想同性感扯上關係，唔想大家focus喺我身材上，但現在睇得好開，性感唔係負面，係一個好的形容詞，認為一個女仔性感，係幾吸引、有女人味，有人讚我性感，反而覺得自豪同多謝對方欣賞。」
近年逐漸靠演技上位的高Ling，透露最想挑戰精神病或情緒病患者角色，劉青雲主演的電影《神探》更是她翻睇過無數次的電影，除了她本身對心理學感興趣外，同時發現現今社會很多人都有情緒病，希望有機會拍這類電影引來大家對這類病的關注。作為公眾人物，面對的壓力比一般人大，高Ling自爆初入行時亦曾因不懂面對負面報道而令自己抑鬱：「例如將我啲相P圖然後話我隆胸，當時唔識去面對，太認真去對待，影響到自己的情緒甚至出現抑鬱，又唔識去睇醫生，只識趁沖涼時喺廁所狂喊來減壓。後來家人都發現我有問題，就幫我報名參加健身班，想我藉做運動發洩一下，因為我當時不停暴飲暴食當發洩，短短一個月重咗三十磅，肥腫難分，就連港姐經理人都問我發生了什麼事？」就在此時，打救高Ling的人出現：「好彩我得到一班做運動時認識的師奶打救，初時佢哋問我係唔係高海寧，我都唔敢認，因覺得全世界都唔鍾意自己，後來焗桑拿時經常碰面傾偈，佢哋開解同安慰我，話唔會因為睇完娛樂新聞唔鍾意我，慢慢我打開心扉，發現原來自己都有人鍾意。」原來高Ling才是「師奶殺手」。
攞獎要實至名歸
事業現曙光，問到她可想拿「視后」？高Ling坦白說：「要遇到好角色，又要自己做得好，觀眾鍾意之餘，仲要公司睇到你的努力才會畀獎你。大家開始認可我的演技，我就向呢個方面繼續進發。我冇set人生一定要得到某啲目標，到你攞（獎），自然就係你（攞獎），我寧願攞唔到全世界都戥我唔抵，都要實至名歸，現在我反而享受拍攝過程同演繹每個角色時所學到的事物。」