■譚香文被指涉嫌「借用」鍾劍華名義籌款。 設計圖片發帖以鍾名義募捐幫「仔女」 鍾劍華稱不知情急割席
正所謂人怕出名豬怕肥，有時太有名氣真係好易有麻煩㗎！話說近日有個叫「鍾劍華教授網絡動員支援小組」嘅facebook專頁，因為時常提供「黃店」資訊，所以都有幾千位「黃絲」追蹤，呢個專頁近日就搞咗個每人捐10蚊幫「黃店」嘅「香港兒女打氣計劃」，當有熱心「黃絲」讚賞香港民意研究所個副行政總裁鍾劍華嗰陣，對方就搲晒頭，事關佢連呢個專頁都未聽過，遂懷疑係一場騙局。點知鍾劍華望多兩望，連黃大仙區議員譚香文都有分享呢個帖文，仲喺YouTube拍埋片叫人捐錢，搞到鍾劍華急急割席，究竟發生咩事呢？■香港文匯報記者 鄭治祖
呢個用鍾劍華名義運作咗兩年嘅專頁，經常分享「黃絲」最鍾意睇嘅資訊，而呢個「香港兒女打氣計劃」就係叫大家捐10蚊去指定中國銀行戶口，除咗幫到「黃店」同年輕人外，仲可以得到「周小龍」送出嘅精美口罩套??！
「周小龍」送罩套 鍾稱不認識
咁「周小龍」係邊個？有網民就話佢係早前喺自己店舖擺「黑暴女神像」嘅連鎖童裝店「Chickeeduck」總裁，事關大家同名同姓，但有網民就懷疑係一場騙局。鍾劍華都喺fb話自己唔識呢個「周小龍」，但就批評譚香文喺其fb貼呢個「籌款」活動嗰陣冇事先知會佢，仲大鬧成件事好過分，又不停「澄清」自己同事件無關喎。
網民「Jason KS Cheng」就問：「會唔會係譚香文畀（俾）人騎劫呀？」「Jojo lam」就反問：「但譚香文的確喺坉茪Hfb post咗呢個活動喎，仲要唔係轉發，係自己重post，唔係好奇怪咩？如果話個fb畀（俾）人hack（入侵）咗，到今日都隔咗兩個星期啦，點會仲未發覺？」
香港文匯報記者睇過譚香文嘅個人fb，發現佢喺8月26日真係post咗呢個帖文，帖中亦附有佢嘅辦事處電話同佢個YouTube個人頻道嘅連結，一點入去就見有條片宣傳緊呢個「籌款」活動，而且片中展示嘅口罩套仲印住「Chickeeduck」個名??，成件事真係撲朔迷離、愈諗愈奇呀。
網民標籤譚香文求證無回應
呢個時候網民就話要請福爾摩斯上身查案，「Yu Tsang」就推測：「周小龍同鍾劍華被人擺上檯（枱）真係有可能，但譚香文個fb專頁同youtube channel（頻道）應該真係佢本人用喎，冇理由自己貼埋啲咁嘅嘢都唔知，莫非個騙徒就係......」「Renee Choi」就問：「點解tag咗譚香文咁多次都冇回應？」「Dorothy Chu」就話：「譚香文最叻就係block （封鎖）人架（㗎）！」「Anthony Lai」都問：「上網查過，嗰個捐錢post留嘅電話真係譚香文嗰電話呢（嚟）喎，究竟......」「Yan Ngai」就揶揄：「可能呢個鍾劍華都係假嘅呢！」