■陳運通批評張俊傑賺盡「黃絲」錢後，卻調轉槍頭攻擊「手足」。 陳運通fb截圖在商言商無可厚非，但「黃絲」總係大驚小怪。「人血龍門（龍門冰室）」老闆饅頭張（張俊傑）因控告前員工楊朗涉誹謗而不斷被「同路人」狙擊，當楊朗承認佢同時被律政司起訴暴動罪後，成件事更係火上加油。有網民就發現，饅頭張搵嘅律師竟然嚟自「黃絲」眼中嘅「藍營」律師樓，該律師樓亦曾派員作為去年元朗「7．21事件」中「白衣人」嘅辯護律師，成件事真係非常諷刺。雖然唔少「同路人」都大鬧饅頭張自私冷血，但都有啲「稍有理性」嘅「黃絲」話，饅頭張要求楊朗賠償因誹謗造成嘅生意損失，都只係在商言商，但呢啲說話喺「同路人」眼中當然勁過火水，再咁燒法真係唔知燒到幾時嘞。
孭住暴動罪嘅楊朗自知難全身而退，遂決定與饅頭張「同歸於盡」，佢前晚就喺Facebook發聲明，話估唔到以「良心經濟圈」發起人自居嘅饅頭張，月前高調宣稱退出「黃圈」，更估唔到賺盡「黃絲」錢嘅饅頭張竟然幫襯「藍營」律師，令佢深感「錯愕遺憾」同「唏噓諷刺」。玩完踢爆，楊朗又形容饅頭張「其心可誅」，仲公然挑機話有大量辯方證人會證明佢清白，所以「法庭見」喎。
律師樓曾為7名「白衣人」辯護
Fb專頁「高登討論區」亦有報道事件，仲摷返晒法庭文件證實涉事律師係嚟自幫過7位「白衣人」辯護嘅江得源律師樓。沙田區「素人」區議員陳運通亦轉載帖文，仲質問饅頭張點解喺「黃圈」賺咗咁多錢仲要恰個後生仔、係咪退咗「黃圈」就可以調轉槍頭喎。陳運通仲批評饅頭張搵相關律師係分化搞事，勸佢懸崖勒馬。
網民「Dicky Mak」就話要講「公道說話」：「張生用完即棄好明顯係生意人，而佢又真係做生意喎，邊個律師啱用傾啱價錢咪用囉，至緊要都係要人賠錢啫。」「孫山」亦叫大家唔好奇怪：「生意佬就係生意佬，做所有決定都係為左（咗）錢，唔好以為淨係張生係甘（咁）樣，仲有好多生意佬都係話自己點『黃』點『深黃』，到最後就係逐個逐個『手足』被綁架失蹤或被謀殺左（咗），你地（哋）都沒（未）必會知道，唔好以為幫襯『黃店』就自以為是啦，呢個×街張，袛（只）係冰山一角咋。」
「Kaddy Pau」就回帶話，楊朗當日爆饅頭張黑材料嘅時候，都係搵「黃絲」眼中嘅「藍媒」《東周刊》，既然冇人鬧楊朗唔啱，咁點解家陣個個都話饅頭張搵個「黃絲」覺得係「藍營」嘅律師就唔啱呢？
「Kaddy Pau」仲貼咗當日楊朗喺fb話收到饅頭張封律師信嘅post，清楚見到楊朗喺個post度話：「係告就快唔好擇日，唔告我嘅正廢柴。」「Ada Ng」就話：「依（??）家佢咪得償所願囉，仲兩全其美tim（??）！」
■香港文匯報記者 鄭治祖