食嘢唔做嘢，做嘢打爛嘢，講緊嘅就係攬炒派荃灣區議員陳劍琴。煤氣公司每年都會喺唔同節日贊助區議員派節慶食品，好似啱啱嘅端午節先資助咗大批「愛心糭」同湯包。難得有人捐糭畀佢哋派嚟扮吓有政績，唔少攬炒派區議員都仆住宣傳，可惜陳劍琴為咗博出位，借啲糭嚟宣傳政治立場，搞到煤氣公司決定終止合作，陳劍琴仲因此大鬧煤氣公司「政治審查」。噚日佢啲「同路人」就喺Facebook話煤氣公司今年突然停止向區議員贊助月餅，睇嚟陳劍琴呢位豬隊友今次真係「成功爭取」嘞。
借糭煽「獨」被終止合作
記得陳劍琴6月嗰陣不顧違反同煤氣公司嘅協議，喺啲「愛心糭」嘅宣傳相中狂影「光復香港」旗幟，搞到煤氣公司話要終止合作，唔知點向街坊交代嘅陳劍琴事後惱羞成怒，反咬煤氣公司無權「干預」、「審查」或要求佢清理辦事處內嘅「擺設」。
煤氣公司當時回覆香港文匯報查詢時話，喺聯絡各區區議員時已講明「在宣傳資料上及派發現場不應帶有具政治宣傳的口號或內容」，否則會終止合作。大批「黃絲」其後質問點解咁多「同路人」派糭但剩得佢出事，大鬧佢死蠢博出位，隨時累到啲「同路人」以後申請唔到任何公營機構嘅贊助。
鄭松泰：今年贊助被取消
「黃絲」講嘅嘢真係好快應驗。「熱血公民」主席鄭松泰噚日就喺Facebook發帖話：「往年煤氣公司都會贊助月餅予區議員或立法會議員；今年取消了，會改為捐贈予非牟利機構。中秋節，大家希望人月團圓，基層街坊收到月餅，邊個派都一樣，都係一點心意。」
網民嘅回應都好禮貌，好似「Pui Shan Ho 」就話：「見過鬼仲唔怕黑咩，多謝『黄絲』保長。」「Chun Him Yim」亦話：「感謝『黃絲』區議員。」「Danny Lo」就更精警：「玩嘢係有成本！」
為咗令大家明白煤氣公司嘅苦心，fb專頁「和你讀心術」就貼返陳劍琴當日大鬧煤氣公司篇千字文出嚟，仲揶揄：「前傳：『黃絲』區議員『煤氣革命』。」「Araya Siki」就話：「依（𠵱）家咪累街坊囉。」「手作達人」吳斯翹（Billie Ng）就替佢哋可憐：「陰功，以後連蛇齋餅粽（糭）都冇嘞！」
■香港文匯報記者 鄭治祖
