第四波疫情肆虐，九龍灣麗晶花園第六座爆發疫情，有居民被送去隔離檢疫之際，觀塘麗晶選區區議員、公民黨畢東尼未見身影，反而喺社交平台分享遊英兼食炸魚薯條嘅相。有麗晶花園居民打算搵畢東尼協助，但竟然換來對方退出群組嘅回應，真係神奇、頂級、超卓。
畢東尼星期一喺facebook發文，話自己去咗英國同家人團聚，仲話自己雖然喺外地，「但仍然時刻留意本區的情況，不敢鬆懈」喎。
咁樣隔岸觀火，當然就俾人鬧爆啦。可能見到群情洶湧，畢東尼區議員辦事處facebook專頁噚日就發帖話畢東尼「因就醫而身在英國」，特別四出聯絡各觀塘區議員到場幫忙協助強制檢測。畢東尼忽然由赴英探親改口變赴英就醫，一眾網民似乎相當不滿，紛紛留言指次次發生大事都唔知佢去咗邊，更有人反問畢東尼喺咪已經辭咗職。
李梓敬批畢東尼齋出糧唔做嘢
不過，更令人激氣嘅，係有居民搵佢求助時，仲發現佢竟然唔回應兼退群。噚日就有WhatsApp截圖顯示，有麗晶花園居民想搵人安排陪同醫生同專家入屋檢查，所以透過Whatsapp尋求畢東尼協助，點知畢東尼居然唔回應兼退群，令到麗晶花園居民相當無助兼無奈。連公民力量成員李梓敬都忍唔住廣傳佢嘅惡行，批評畢東尼身為區議員齋出糧，唔使做嘢。「議會監察」亦喺facebook 揶揄畢東尼為咗同麗晶花園嘅選民保持社交距離，遠赴英國食炸魚抗疫。
俾人揚晒啲衰嘢，畢東尼都冇驚過，向傳媒話係「覺得在群組溝通不太有效率」喎，仲話自己冇計劃提早回港，又話自己同個仔10個月冇見，取消嘅話「過不了自己那關」。咁又係，街坊、選民嗰關啦喎，過咗海咪神仙囉。
■香港文匯報記者 倪思言