多名中西區居民昨日接受香港文匯報訪問時批評許智峯是懦夫，潛逃的行為不負責任，更辜負選民對他的期望。他們均表示，許智峯所得的薪津全部都是納稅人的血汗錢，政府應特事特辦，停止發放不服務市民的區議員薪金及辦事處津貼，同時檢討司法制度，不應讓高風險疑犯保釋。
Amy：政府不應再出糧畀佢
香港嘅司法制度明顯有問題，點解明知許智峯咁高風險都可以畀佢保釋，結果咪走咗佬，簡直就係對唔住區入面嘅選民。政府應該及早做嘢，唔好再出糧畀佢，唔應該要等幾個月之後先DQ佢。
陳太太：糧照出對市民唔公道
既然許智峯已經棄保潛逃，政府唔應該亦唔值得再出糧畀佢，無可能「人照走、糧照出」。如果政府唔即刻停止發放薪金及辦事處津貼，就係對市民唔公道，畢竟呢啲都係我哋納稅人嘅錢。
陳先生：講明走佬仲要養佢？
雖然我唔覺得許智峯喺社區入面嘅工作有啲乜嘢建樹、可以為市民做到咩改善民生嘅工作，但佢呢種潛逃行為已經辜負晒所有投佢票嘅選民期望。佢都講到明走佬，做乜仲要畀納稅人嘅錢養佢？
伍先生：政府不應死板做事
一個人如果違反公司規例理論都要被炒魷魚，許智峯嘅行為基本上屬於超級違例，加上又已經走佬，理論上佢份糧同辦事處津貼應該從嗰一分鐘開始停，政府唔可以再咁死板做事。
李女士：許畀街坊印象一向差
許智峯畀街坊嘅印象一向都好差，對香港同市民冇乜貢獻，佢𠵱家走埋佬，點解政府仲要繼續出糧畀佢？咁樣一啲都唔合理囉，政府一定要做嘢，cut（停）佢糧。
整理：香港文匯報記者 鄭治祖
圖：香港文匯報記者 攝