反咬「傳真社」亂報 「黃絲」盲撐：唔覺有問題
世界上永遠有類人係叫唔醒，呢類人統稱「黃絲」，因為佢哋醒咗都會扮瞓。話說網媒「傳真社」近日深入調查「龍門冰室」嘅賬目開支，結果如坊間所想係亂到七彩，簡直係針對「黃絲」嘅世紀大騙局。「龍門」事後反咬「傳真社」胡亂報道，但就冇正面回應質疑，所以唔少網民都深知肚明，但總係有「黃絲」繼續盲撐，聲稱「龍門」退出咗「黃色經濟圈」所以唔覺有問題。原來「黃絲」為咗拗贏其他人，就算「同路人」不再同路都要繼續撐，真係辛苦佢哋嘞！
●香港文匯報記者 雨航
據「傳真社」嘅報道，「龍門」老闆張俊傑喺2019年底成立所謂「香港人嘅冰室資源分享中心」，話通過籌款同售賣抗疫用品及提供服務去「支援年輕人」，但中心嘅運作一直備受批評，所以「傳真社」就整理咗有關投訴，仲逐樣踢爆其中嘅可疑之處。
仲記得以前張俊傑俾「同路人」質疑嗰陣會寫幾千字去「澄清」，點知「龍門」日前就冇喺facebook公開反駁件事，只係喺香港文匯報查詢時回覆，喺舊年6月已經向《立場新聞》回應過，無再覆記者有無補充。咁究竟係費事駁定無得駁，睇嚟得「龍門」嘅人先知嘞。
被扣「莫須有」 「傳真社」質疑反擊
俾「龍門」反咬仲被扣「莫須有」罪名嘅「傳真社」昨日喺fb專頁發帖反擊，點出多項「龍門」無回應嘅質疑，包括：
「龍門」專頁公開過出售抗疫用品嘅金額，單係去年2月收入已有114萬元，但財務報表上1月至2月嘅入賬記錄只有3.3萬元；
抗疫用品項目成本嗰715萬元無明細，亦冇解釋用咗喺邊度；
張俊傑講過會同「良心供應商」喺抗疫用品上投資500萬元，但冇解釋呢筆錢係資源分享中心嘅投資定係張俊傑同供應商嘅投資，而呢個項目最後虧損460萬元，亦冇解釋投資者嘅虧損係咪由資源分享中心承擔......真係數都有排數！
呢個時候「黃絲」又繼續展現「人一『黃』就腦殘」嘅風格。「Srg Lei」幫「龍門」死撐：「睇完得啖笑，仍然對你地（哋）嘅所謂嘅証（證）據好失望，同埋唔通係（喺）帳（賬）目講明某D（啲）錢用係『抗爭』或捐款等比（俾）『黑驚（警）』拉」。「Owen Wong」就鬧：「捐錢畀你查啲無×謂嘢，慘過倒錢落海」。
「劉安達」就話：「咁搞笑，明明人地（哋）話自己退出『黃色經濟圈』，咁多人屈佢係『黃店』。」「Cherry Lee Ping」就反駁：「既然都退出咗，做咗衰嘢鬧佢都啱啦，奇就奇在啲人話佢唔係『同路人』但又要幫住佢，咩邏輯？」
網民：事實對盲粉係唔值錢
「Iris Wan」就叫「傳真社」睇開啲：「咁多字，好多人唔會睇唔會消化㗎。事實對盲粉嚟講係唔值錢，佢哋要嘅係你唔好打破佢哋嘅信仰。」「ToKiu Chao」亦道：「其實龍門之前條數都好有問題，（涉嫌）私吞咗幾千萬手足嘅捐款，又一直解釋唔到。所以一班人話唔好查佢，真係好有趣。亂世之中，有人借用同情心，將錢全部私吞，呢個問題根本要正視。」