自稱搞「抗爭」，其實最終目的就係斂財。所謂「屠龍小隊」曾經被攬炒派吹捧為「真勇武」，??家就有「黃絲」藉住呢個「光環」呃食。一個自稱為「屠龍小隊團長」嘅人早前藉同樣精於食人血嘅《蘋果日報》嘅平台攬生意，話自己喺台灣搞咗間港式茶檔就嚟開張。雖然都有「黃絲」為佢擔心，話「流亡」嘅人都係低調啲好， 但都有人睇破：「唔講出嚟點吸血？」
一個自稱係「屠龍小隊」「團長」日前接受《蘋果日報》訪問，宣傳自己喺台中即將開張嘅港式茶檔「R.S.I」，仲分享自己喺台灣開店嘅過程，招攬人幫襯。
「連登仔」質疑身份
如此高調行事，點睇都唔似一個逃犯。「連登仔」「唔啱聽就係五毛」就懷疑：「呢班人血呃錢定點？真『屠龍』仲要『團長』會大大聲話畀人聽兼且開餐廳？」「齊藤京子」就話：「想知屠過咩龍。」
有人試圖幫「團長」解圍，「旅行安家必備良藥」話：「去左（咗）台灣，出名反而安全過唔出名。」「連儂貓」就話：「既然佢要主動講身份出黎（嚟），就尊重對方啦，當然會吸引到人幫襯，同時亦有風險。」但有人睇得通透，「奴隸港豬」就話：「唔講出黎（嚟）點吸血。」
講真，??家啲所謂「屠龍小隊」成員係咁俾人懷疑，同攬炒派貪得無厭、滿口謊言有直接關係。自從「屠龍小隊」成員潛逃後，關於佢哋嘅醜聞就周街都係。
同樣係黑暴組織嘅「國難五金」早前就爆料，話有兩個自稱係「屠龍小隊」成員嘅「一肥一瘦」，聲稱代表「手足」經中間人向「家長」籌錢着草，其後雖籌到20萬，但就隱瞞「手足」，搞到班「手足」要自費去台灣。之後啲「手足」就展開報復，向網媒「PPPN」爆晒「一肥一瘦」啲衰嘢。而「一肥一瘦」又夥同台灣導演周世倫篤返「PPPN」，令「PPPN」成員喺香港被捕。
呢個自稱係「屠龍小隊」「團長」都同呢啲醜聞有關，佢當時就接受咗《蘋果日報》採訪稱，「屠龍小隊」中喺台灣嘅只得佢一個，佢唔識周世倫，亦無搵過佢幫手，其餘自稱係「屠龍」嘅都係「冒認」。成team人都唔見得光，究竟邊個真邊個假大家就唔知，但佢哋各自為咗錢而爭到一地狗血就人人都知囉。 ●香港文匯報記者 杜思文