今晚谷草跑九場夜賽，以全闊A跑道進行，頭場下午六時四十五分開跑，全日並無設立錦標賽場合。練馬師方面，沈集成、羅富全、蘇偉賢及徐雨石皆屯駐重兵，值得優先留意。騎師方面，潘頓、雷神、田泰安及巴度都手執多匹實力馬，不妨當作扶手棍看待。
第一場、第五班、一六五○米。「有苗頭」回看前仗於五班出戰谷草千二，表現令筆者念念不忘：出閘後守在馬群中疊，沿途走三四疊望空，入直路力追只負兩身位，須知前三名馬全部貼中內疊，而本身最後二百才望空衝刺鞭長莫及，今次轉戰一哩進軍，且看能否有更進一步演出。
第二場、第四班、一八○○米。「甲烷」特擅谷戰，剛戰窄場千八全程殿後，卻在末段短兵相接時未能及時趕上輸條頸，純粹欠運而已，今仗瞄準此程攻堅，所遇對手實力一般，配七磅仔周俊樂操刀，希望能夠發揮本身實力，贏出季內首場頭馬。
第三場、第二班、一○○○米。「平常心」季內喺谷草短途表現出色，六戰跑獲四冠一亞一季，回看上仗加至九十六分出戰一班窄場千二，結果潘頓亦發揮水準，力戰得第三兼順利捧走百萬挑戰賽獎盃，拚後小休埋門由潘頓試閘走來勇況未減，今仗落二班作賽，藉當銳之勢可爭第五W。
第四場、第三班、一○○○米。「威星神駒」四歲E布馬季內五戰，表現持續進步，大前仗跑近後，翌仗再爭谷草一千，更在巴度胯下以凌厲後勁追入Q腳；上仗續攻同程跟前冇後，所遇的對手「和氣生財」及「年年旺」俱是當銳的三班同程好手，以此伸算，以牠現時能力現身處三班應值中上游水平，今次操好捲土重來有力補中。
第五場、第四班、一二○○米。「合夥贛勁」剛暑期分別兩度接受矯正喘鳴和喉室切除手術，休息了半年才於上年十二月尾田草千二復出跑入季軍；前仗轉戰千四，早段步速極慢，頭三段有如晨操，牠居後形勢非常不利，但造出全場最快末段追入季軍，亦是前四名唯一走二疊參賽馬；上仗升四班再戰，面對強敵也蝕追第四，今次渡江縮爭千二，可憑輕磅優勢擊敗對手。
第六場、第四班、一二○○米。「五邑之星」出賽四次，唔計上仗獲得四至七名，前次加眼罩爭田草千二，入彎時外閃，最終也保住第四；上仗渡江出戰千二，賽前雷神過檔考驗走勢省鏡，臨場打到兩倍開跑，結果力拚僅負短馬頭位，論馬持續進步，今賽只要交出水準，應有力打開勝門。
第七場、第四班、一六五○米。「專一」上場轉葉廄首戰，由潘頓策騎爭同程跑季軍，騎者認為沒有犯錯，而且末段打衝鋒時受阻窒步，其演出已算合格有餘；今晚原庄人馬再戰同一途程排位又好，冀望能夠發揮出本身實力，有權作出補中省靚招牌。
第八場、第三班、一二○○米。「魅影揚飛」季內跑過三場千四無功，之後轉攻谷草千二亦贏不到馬，只得過一亞一季兩殿一第五，狀態尚算穩定，尤其近兩仗在谷中千二俱排外檔，今次對手實力非強，加上季內未勝必好鬥志，是有可博之道。
第九場、第三班、一六五○米。「喜蓮慧星」東廄D布中長途之輩，季內七戰，最近三仗跑谷草中距離及田草一哩皆走近，當中大前仗跑谷草一哩只僅負「喜駿駒」與「王炸」，該兩駒之後俱再贏馬或上名，賽績水準俱佳；拚後由潘頓試課千七米谷草閘，做足操練工夫，今仗回師谷草一哩出戰，已沒有「喜駿駒」及「王炸」般的強手在陣，有望打開勝門。