●黃店「一捲菲林相機」被揭發貨不對辦，網民鬧爆。 連登截圖黃店真心當黃絲係水魚囉！不過，有黃絲仍然唔死心係都要入魚塘。近日有「連登仔」喺「連登」發帖，話由班黃絲大學生開嘅菲林相機舖「一捲菲林相機」（「一捲」）係大伏，因為有好多苦主向佢訴苦，呻話買完菲林相機後先至發現貨不對辦有問題，例如明知鏡頭入面有霞氣都照賣，結果客人用後覺得有問題叫幫手清理抹鏡，竟然要收成400蚊，完全係啞子吃黃連，亦有苦主投訴，聲稱買到只影一捲菲林就唔能夠再影嘅壞相機，完美呼應到個舖頭名。離譜到咁，唔少「連登仔」都狠批佢哋唔係黃店，而係黑店呢。
近日一名叫「D丫精」嘅「連登仔」喺「連登」發帖，話終於有「一捲」嘅苦主出現。一名苦主話，自己本身部相機有一個月保養期，當時發現觀景台（器）同鏡頭都蒙，於是返去舖頭要求（店員）幫手清理，點知店員話保養只係包零件壞咗，抹鏡一次要收成400蚊，仲講多句：「其實鏡頭有少少霞（氣）唔太影響成像。」真係伏到呢......搞到苦主當場把「一捲」列入「黑名單」。
有一名用咗1,400元買「傻瓜機」嘅苦主遇到嘅事仲離譜。佢話「一捲」竟然喺賣機時同苦主講，鏡頭蒙咗唔影響成像，點知影完第一捲（菲林）睇成品先發現有第二個問題，即最後嗰塊鏡片好花，仲要鏡頭有少少發霉，結果返舖頭問都係話要收錢抹鏡，真心當人係水魚囉。
翻睇有關於「一捲」嘅報道，當時接受訪問嘅老闆「Richin Chin」聲稱「經營絕不馬虎，每部相機均經過仔細檢查後才放售，並提供1個月售後保養和1次免費沖曬服務，亦「樂意解答客人問題」，『我哋都唔想佢拍第一捲就出事』。」但實際上真係「一捲就玩完」喎。
「D丫精」就狠批該店賣支有霞鏡頭畀客都唔出聲，客人發現咗之後話要收400蚊抹鏡費，「真係×街至極，傻瓜機花×到咁都話唔影響成像，好×心呢d（啲）×街商戶唔好打黃店旗號做生意啦。」佢仲揶揄：「係（喺）『一捲』買機，影一捲就壞。」
苦主哭訴：呢次學費真係貴
「連登仔」「愛你管不了是禍」亦留言稱自己都中過伏，話經朋友介紹去「一捲」買機，當時店員推咗部新手入門單反菲林相機X700畀佢，鬼迷心竅下連鏡買咗三千蚊，「重（仲）要明知我（係）一張白紙，試機第一捲菲林推（介）我買portra 400，影第一捲影×到27張，過片位卡實左（咗）拉唔到、過唔到片。」苦主仲哭訴話：呢個（次）學費真係好貴，因為後來先知部相機根本唔洗（使）咁貴。連「D丫精」都話：「3K（3,000蚊）買X700，佢起碼賺你2K（2,000蚊），『一捲』真係賺×到笑。」
其他「連登仔」都覺得「一捲」真心過分，「任腎齋」話：「黃店唔可以有黑店？咁做生意法幾黃都無×用啦。」「唔好意思差2毫子」則反問：「其實係啲咩傻×先去呢啲黑店買機......」
「愛是含XXX」直言：「不嬲都話『一捲』啲機淨係影到一捲（菲林）。」
●香港文匯報記者 郭家好