●歐文傑話：「坐監都可以係另一種逃避」。 fb截圖黃絲口講「齊上齊落」，但事實就大難臨頭各自飛，仲要用盡方法掩飾自己因淆底而離開嘅事實。一早已經走佬去咗加拿大嘅《十年》《樹大招風》導演歐文傑，噚日就喺社交平台fb回應涉嫌違反香港國安法正被還柙嘅劉頴匡質疑有人走佬嘅言論，話「坐監都可以係另一種逃避」「選擇留低同投降其實係無分別」，令一眾黃絲嬲爆圍插佢，真係一地花生。
劉頴匡日前透過朋友喺fb發信，稱當自己知道要承受刑責時都「選擇」留喺香港，更質問其他「有能力守護香港」嘅人有咩理由「恐懼」、有咩理由捨佢哋而去，仲話「一齊努力抵抗移民潮係每一個人嘅當務之急」。
呢番言論似乎激發到歐文傑嘅創作靈感，令佢喺fb度以家暴家庭為背景大作故仔，講述「細佬」因為忍唔住老竇家暴而「開拖」，搞到被人拉咗仲坐埋監。當其他家庭成員自身難保都開始諗住走佬，「細佬」突然喺獄中寫信話大家走晒以後頭家就散，以後無人探監，希望大家唔好丟低佢，最終成家繼續留返喺屋企，繼續去探細佬監，仲好努力喺出面搵家用返嚟畀個老竇。
黃絲鬧爆故事反感
雖然歐文傑就話：「以上故事，情節荒謬，寫出嚟自己都嫌膠」，但最尾又補多句「如有雷同，實屬香港人嘅不幸」。但唔少黃絲睇完個故仔都非常反感，「Ngan Kin Chung」批評：「噏乜×，點×解上幾代香港人淆底走佬都可以咁多廢話。」「走唔係問題，講到自己冠冕堂皇就真係好×嘔心。」「Chow Ling」就話：「走咪走，咁多嗲做乜？坐監留喺到（度）都輪得到比（俾）你嘲諷？」
見到咁多黃絲鬧自己，歐文傑不甘示弱反駁話：「喺我眼中，坐監都可以係另一種逃避。我講咁多都只係希望大家唔好自投羅網。」佢仲寸到話：「你有你唔走開自由，但唔走請後果自負。」唔單止咁，佢仲揶揄班黃絲係「小朋友」，叫佢哋唔好吓吓都情感勒索呢。
歐文傑咁出位嘅言論令到fb專頁「本小姐」不滿歐文傑「抹黑」留低嘅人，連發兩帖圍插埋一份：「人哋唔走人哋自己固然會後果自負，唔通個後果係你負？」佢仲揶揄返「點解要將留低嘅原因同後果（嗰）咁樣歪曲，情感勒索果個好似係你呀小朋友。」抽水專業戶、「港獨」藝人杜汶澤都插多腳詛咒：「因為加拿大生活比較沉悶，得×閒得濟（滯），我會建議佢去打獵，希望佢有機會撞到大灰熊。」 ●香港文匯報記者 倪思言