●鄭錦滿話杜汶澤買錶「好勵志」。 鄭錦滿fb截圖黃圈嘅鬥爭隨時可以因為任何嘢引爆，甚至因為一隻錶。走咗佬嘅「黃絲」藝人杜汶澤日前喺facebook話自己曾經在被討債走佬去台灣前賣咗自己第一隻勞力士，??家生日前買咗同一個款式送自己，又夾硬抽水話呢個寓意乜「失而復得 還我河山」。好似同佢唔啱牙嘅「熱血公民」鄭錦滿就寸爆杜汶澤真係「好勵志」，話自己認識一個有隻撈（勞）嘅人，係有心人籌旗夾畀佢坐完監出嚟重新生活之用，似乎暗指某人得把口，實際淨係識得益自己。唔只咁，佢哋各自嘅支持者亦都加入論戰，花生多到，真係食唔晒。
杜汶澤日前就喺社交平台facebook發文，影住自己戴住隻金色勞力士話：「19歲出來混時買了我人生中的第一隻勞力士，然後同年輸掉一切跑去台灣前賣掉。今年49歲生日前，決定在台灣買同一款式，送給自己。」勁識抽水嘅吽A仲要話佢買錶係寓意「失而復得 還我山河」??。
「走咗佬講咩『還我河山』？」
曾經多次jer住杜汶澤嘅鄭錦滿，今次都唔會放過呢個大好機會，喺轉貼杜汶澤嘅帖文時暗串話「好勵志，香港人，加油！」佢話自己認識一個有隻撈（勞）嘅朋友，係有心人籌旗夾畀佢坐完監出嚟重新生活之用，唔知係咪暗寸杜汶澤得把口。
兩人嘅支持者都互片。「Qong Liu」揶揄杜汶澤：「佢都放棄香港跑路（走佬）過台灣了，仲講乜『失而復得，還我河山』呢？」「Felix Ho」亦話：「講真，要『還我河山』，返黎（嚟）香港嘛，點解要走啫。」
「Jeff Li」更借機起底杜汶澤：「呢個人好×勵志呀，年少時爭人錢爭到著（着）草去台灣同入亞視，之後開左（咗）而（??）家間公司又拖過人人工仲要聲大夾惡，愛情上又結婚又離婚又再結婚，而（??）家做埋黃絲代言人但又要食kfc仲移埋去台灣做防疫×大將軍，不過勵志還勵志，呢條友咁××街都係唔好學了。」
杜粉「Timmy Tong」就還擊話：「『 熱狗』既（嘅）錢每一分每一豪（毫）都係用係（喺）手足到（度）架（㗎）！從來唔會買自己野（嘢），除左（咗）食美心。」「Vito Adams」就話：「我都認識d（啲）熱狗為左（咗）錢去宣誓，好偉大。」
其實，大家都係半斤八両，就一人少句唔好引戰啦。 ●香港文匯報記者 倪恩言