●「好鄰舍北區教會」日前喺facebook宣布佢哋喺上月底已經停運。 fb截圖由涉嫌欺詐捐款嘅陳凱興創辦嘅「異端」教會「好鄰舍北區教會」，日前喺facebook宣布佢哋喺上月底已經停運，粉嶺、觀塘兩個聚會點亦同時停租。唔少網民都覺得陳凱興去年已被揭隱瞞1,800萬元捐款着草英國，今次擺明係「財到光棍手」，「好鄰舍」真係呃夠就執笠呢。
無神學院背景、自封「傳道人」嘅陳凱興創辦所謂「好鄰舍北區教會」後，喺2019年黑暴期間發起「守護孩子」阻警執法，協助四處破壞嘅暴徒逃離法網，「好鄰舍」喺同年仲以眾籌、支援黑暴等名目募捐，籌到成2,700萬元，但公布只收到890萬元，涉嫌隱瞞1,800萬元。陳凱興夫妻喺舊年10月着草英國，涉嫌嚴重欺詐同洗黑錢罪行俾警方通緝，唔少「手足」亦鬧爆佢哋夾帶私逃。
據報道指，陳凱興今年2月再喺英國與其教友創辦所謂「英倫好鄰舍教會」，並繼續重施故伎，發起網上眾籌，煽動信眾支持他「傳道」。而噚日佢哋就喺facebook宣布「好鄰舍北區教會」喺上月底已經停運，粉嶺、觀塘兩個聚會點亦同時停租。
唔少網民都覺得「好鄰舍」係呃夠就執笠。好似「Shuyan Li」話：「掠水完畢，挾（夾）帶，着草。」「Ryan Chan」就話：「冇晒黑錢即刻收（皮）。」「Wilson Chung」就質問：「神棍騙走的捐款有清楚交代嗎？」「腦人家」話：「咁係咪即係『老笠』呀？」「肥老泥」就覺得唔可以畀班「好鄰舍」神棍「拍拍屁股」走人：「呢啲靠呃人同情心去呃錢的垃圾！一定要追究落去！」「Ip Man」就話：「借教會為名，卻行邪惡的事，神必追討。」
偏偏黃絲扮盲，係咁感謝佢哋「守護孩子」「守護香港人」，死都唔認佢哋係「守護金錢」。網民「陳諾仁」就感嘆：「最難得，係呃左（咗）咁多人，仲一大班支持者。」「查理士」就笑：「傻仔錢真易呃。」 ●香港文匯報記者 黃書蘭