●何忻諾自爆被鍾翰林用裸照要挾見面。 何忻諾fb截圖《立場》聽一面之詞拒修正 何忻諾爆被鍾用「公開裸照」要挾
黃絲成日講「良知」，但其實就成日老屈、造假。前「學生動源」召集人鍾翰林日前接受《立場新聞》訪問，講到自己坐監後俾「女友」飛，搞到全世界鬧爆被視為「女友」嘅前「學生動源」成員何忻諾。何忻諾決定玩大件事，自爆佢同鍾翰林早就分咗手，但就有人用「公開裸照」嘅賤招嚟要挾佢。佢仲踢爆《立場新聞》唔理佢本人嘅澄清，聲稱話要「忠於」鍾翰林嘅「敘述」喎，令佢感慨「《立場》報新聞嘅時候唔在意事情真確性」而造假新聞，真係畀大家睇到黃圈要幾黑暗有幾黑暗。●香港文匯報記者 黃書蘭
《立場》日前喺報道有關鍾翰林同前「學生動源」發言人何諾恆嘅一篇專訪入面，話鍾翰林之所以冇着草，係因為「唔捨得女友」，緊接住又講「還柙數月後，對方寫信及探望他的次數漸少」，仲要向朋友打聽先知個「女友」諗住去海外升學。訪問講講吓仲引述鍾翰林話，「女友離開，或才是更好」，真係塑造到佢係「深情聖人」，「女友」就「忘恩負義」咁。
嘩，講到自己咁「情深款款」咁，事實上，鍾翰林明明喺舊年10月想去美國駐港總領事館尋求「政治庇護」，之後俾警方拉咗㗎，𠵱家就話為咗女友所以唔肯走，牽強啲啩。為咗扮「義士」，連女友都擺上枱。雖然《立場》篇訪問冇提鍾翰林個「女友」叫咩名，但稍為了解佢哋嘅人，就知鍾翰林所講嘅係何忻諾。咁樣嘅「新聞」一出，何忻諾當然就俾人鬧爆。
不過，黃圈最出名係咩？咪就係攬炒。何忻諾日前就喺facebook上載兩張截圖，內容講原來佢同與鍾翰林喺舊年1月已經分咗手，「《立場新聞》所講嘅『女友於還押（柙）後漸少聯絡』係fake news（假新聞）。」
何忻諾話，喺《立場》篇專訪出街後，佢已透過友人搵《立場》記者澄清，點知對方竟然好有諗法咁話覺得解釋起嚟「費時失事」，「為免惹讀者無謂猜想，加上考慮到此文是鍾的專訪，內容忠於他的敘述較佳，而他向我一直形容（妳何忻諾）是『女友』，故我建議無需（毋須）改動內文。」
何忻諾都將《立場》記者嘅回覆截圖公審話︰「當時（事）人（我）澄清後依然咁寫，係咪代表《立場》報新聞嘅時候唔在意事情真確性？因為呢個係鍾（翰林）嘅個人專訪，所以對其他人作失實指控都冇所謂？」
批何諾恆做中間人幫手要挾
何忻諾又大爆自己喺同鍾翰林分手後，俾對方抹黑自己周圍搵性伴侶，「用我嘅裸照嚟要挾我見面、凌晨拍我屋企門、甚至騷擾我朋友，念在曾經有感情，我冇選擇公開。但轉個頭講到我『用完即棄』，我因為佢坐監而分手，呢啖氣我真係吞唔落。」
何忻諾上載另一張圖公審同鍾翰林一齊受訪嘅「摯友」何諾恆，話何諾恆涉嫌做中間人幫鍾翰林要挾佢：「如果唔係就大家互相傷害，佢就公開晒所有相出嚟。」何忻諾喺帖文中質問︰「唔知咁算唔算勒索呢？」
成件事派晒花生，引嚟唔少「手足」轉載，《立場》事隔三日先跪低，終於喺內文攝咗一句「（編按：鍾的前女友在本文刊出後公開稱當時二人已分手）」，真係澄清得不費吹灰之力。
「同路人」批《立場》唔求證
唔少同路人都睇唔過眼。曾經參選區議會嘅攬炒派中人蕭浩然揶揄《立場》話：「我當年落選，係因為準備去日本做新垣結衣（日本女星）老公。」沙田區議員、「馬鞍山守護線」鍾禮謙亦話：「等緊《立場》記者訪問我，到時我話雞排妹（台灣性感女藝人）係我老婆都得，因為內容忠於我嘅敘述會較佳。」
「YT Sam」鬧完「垃場」唔求證、娛記都不如後，就鬧埋鍾翰林︰「鍾生，分手就攞前度嘅裸照嚟威脅人，做男人做到你咁，......幫『兄弟』手去威脅人嗰個，你乜×嘢政治人嚟㗎？黑社會呀......仲義士？義喺邊呀？睇過？」