■毛姨（中）帶游BB洗底，游BB（左）坐到縮晒膊。 fb圖片「青山新症」（青年新政）游BB（游蕙禎）上星期突破重圍入到立法會會議廳，除咗有一班「波皮會」反對派男議員護駕之外，公民黨毛姨姨（毛孟靜）視為己出咁攬到實，更令人側目。雖然游BB係咪議員仲係一個問號，但係佢早幾日掛住議員個名，同毛姨姨仲有一樣未宣到誓嘅小麗老母（劉小麗）去搵老人家飲茶，毛姨姨更加搭住佢膊頭影大合照，睇落好似好friend（友好）咁。有巴打覺得毛姨姨係想趁單司法覆核審理之前，帶游BB去洗底，亦有人認為毛姨姨想為傳統反對派爭取支持。不過，更多網民就話見到佢哋三個就想嘔，游BB做乜都無用，睇嚟岈I洗底都好，都洗唔清佢體內啲「獨素」！
明愛上星期六舉辦「與立法會議員茶敍」活動，游BB、毛姨姨同小麗老母三個九西議員同一班老人家傾偈，事後游BB同毛姨姨都將活動相片放上facebook打卡，其中一張大合照見到毛姨姨搭住游BB膊頭，另一張就顯示游BB坐到縮晒膊咁。
游BB同毛姨姨，一個25歲，一個59歲，兩個政治取向都唔太一樣，點解會行得咁埋？「膠登討論區」嘅巴打就各有解讀。「你太肥喼汁」覺得係毛姨姨帶游BB去洗底，令到後者睇落好似好關心社區，「為上庭打底。」「樂高」就話：「毛姨姨呢啲醒呀！出手幫佢哋一把，不論最後成功與否，『泛民』都賺到多幾個在野議員同離地中產支持。」
網民：做乜都冇用 不如早割席
淪為眾矢之的嘅游BB，連facebook專頁都變成洗版天堂，一出post（帖文）自然引來大批網民非議。「keith chan」直言「扮晒嘢，見到你哋三個好嘔心」，「Jack Hui」就認為游BB「做乜都冇用」，「你搞得『港獨』，喺立法會玩嘢，根本就沒有做議員嘅資格！」就連反對派支持者都唔幫佢，「Steve Chiu」慨嘆：「唉，以油雞這樣的言論只會為『泛民』添煩添亂。我內心真是很矛盾：究竟應該撐佢繼續做議員，抑或長痛不如短痛，犧牲『泛民』最重要的兩席，早點送兩位大帝上路！」
毛姨姨嘅facebook相對風平浪靜，但都有一兩粒花生食吓。相信係「熱狗」嘅「Tracy Cheng」見到游BB坐到縮晒膊，就寸道「連坐喺度影相都完全無腰骨，好心份人正直啲啦」，俾人圍住鬧佢私怨行先，毛姨姨亦都加把口話佢唔公平，「佢只係唔想遮到後面位老先生入鏡」，幫游BB幫到出晒面。 ■記者 陳庭佳