記者 顏倫樂
啟德地價再創新高，不少測量師表示難以置信。理想城市企業估值部主管張聖典昨日表示，海航集團兩幅啟德毗鄰地皮合併發展，無論建築材料、裝修、宣傳費用等都可以有所節省，合併發展金額可以較單一項目平10多個巴仙，故發展商說不定會再購入鄰近地皮，令成本更平。
合併發展可慳逾10%成本
張聖典昨日亦坦言，想不到啟德區地價還可以更高，因為發展商正在以「麵包價買麵粉」，「一般發展商唔會咁做，都計唔到數。我哋估價時都唔會咁睇，但佢哋連續兩次都咁投，證明佢哋唔覺得有問題，有佢哋自己的計劃。」問到如何看今次中標價，他笑指：「如果其他發展商用呢口價我就意外，海航我反而唔意外。」
今次地皮再次由中資中標，張聖典說，雖然市場有評論指內地資金「走資」，但其認為今次海航做法有所不同：「你有50億元，可以買上市公司、買股票，變現一定快過你去買一幅地皮來發展。」地皮以每方呎樓面地價1.36萬元批出，他預計將來售價要到每方呎2.5萬元以上才有合理利潤，相信發展商是希望將該一帶打造成「第二個九龍站」。
發展期料5年項目風險大
張聖典說：「唔係話啟德無呢個潛力，嗰邊交通都好，又係新的商業核心區，之前幅商業地又俾SOGO投到。但一般情況真係唔會咁樣投，因為要市場適應個呎價要啲時間。」市場人士擔心，發展商為賣樓有利潤，將來或會拖長項目的出售時間。張聖典指，項目發展年期至少5年，無法預測5年後樓市的變化，但項目的投資風險的確好大。
萊坊高級董事及估價及諮詢主管林浩文估計項目總投資額或要約100億元或以上。美聯測量師行董事林子彬表示，啟德發展區為政府重點發展區域，同時坐擁市區及沙中線優勢，故吸引不少內地發展商積極競投。昨日開標的地皮發展密度在區內較低，位處前排單邊位置，景觀較佳，相信不少單位可望海景。