■本報去年有關陳家洛發表「升不起」論的報道。 資料圖片反對派係幾時變到咁「玻璃心」，講句五星紅旗升起都冒犯到佢呢？本報早前率先揭發公民黨陳家洛曾經喺課堂上叫學生想像「五星紅旗升不起」的情況，其後佢又喺報章撰文，聲言「試想像某天一覺醒來，那象徵着中國共產政權的五星紅旗升不起來了，這個政權真的倒了」。自己就無限FF（幻想），噚日佢喺行政長官辦公室大樓門外示威時，聽到CY（梁振英）一句歡迎嚟睇升國旗就激到彈起，話CY「淨係搞鬥爭」喎。陳家洛同佢啲粉絲碎到一地「玻璃心」，唔少CY支持者都唔明，到底句嘢有咩問題呢？
本報去年8月報道，公民黨前立法會議員陳家洛曾在授課期間，叫學生思考如果「五星紅旗升不起」時應如何做，涉嫌在校園散播「港獨」。有關言行雖然被各界狠批，但陳家洛似乎覺得自己「巧威威」，一個月後再喺《明報》撰文，聲言「顛覆現有秩序的選項」是為了「監察」政權、「試想像某天一覺醒來，那象徵着中國共產政權的五星紅旗升不起來了，這個政權真的倒了」云云。
自己就可以無限FF講乜都得，CY同佢講返一句嘢就即時黑面。
根據媒體片段，噚日陳家洛去示威時，CY接過佢封信後同佢講咗幾句，並指咗下旗杆，陳家洛即時黑面，又啤住CY。事後陳家洛分別向媒體同埋喺自己facebook上聲稱，係CY一見到佢就「火山爆發咁」，同佢講「呢個係升五星紅旗嘅地方，你今日出嚟呢度做乜嘢？」喂阿哥，影唔到CY表情、錄唔到CY音，你話佢講乜都得啦。
陳家洛老屈 CY網誌澄清
CY就喺網誌度話，自己噚日見到「久違了的前立法會議員」陳家洛，「我向陳家洛表示行政長官辦公室大樓每天早上八時都會升起五星紅旗和區旗，歡迎他來看升旗。」並指出陳家洛曾發表「五星紅旗升不起」言論。
一眾陳家洛粉絲就喺伭b留下滿是玻璃碎嘅留言。「Katty Law」就話︰「CY真係有精神病。」「Terence Chan」就自行演繹謂︰「有5（五）星旗的地方就唔比（畀）人請願？」「Gregory Lai」亦跟住講︰「英狗只識用權欺壓百姓。」「Susan Mui」更將𠵱種精神發揮到極致話︰「689 已出賣靈魂給撒但（旦）！」
「一句話都包容唔到」被嘲無能
不過，唔少市民真係搲爆頭都唔知佢哋嬲乜。「Sam Chan」就問︰「奇怪！告訴他五星旗每天升起為何是挑釁呢？！佢up（噏）乜野（嘢）呢？！」「Windsor Chan」則批評陳家洛話︰「CY這句話有乜唔妥？一句說話都包容唔到，又用傳媒去吹水，無能到極點！」「Yukgai Lui」就話︰「支持CY，究竟係邊個挑釁在先呀？你哋都挑釁咗四年幾喇！」 ■記者 甘瑜