房屋為香港市民最關注嘅議題，曾俊華前日提出政綱，話要令全港六成人有公營房屋住，唔少「薯粉」大讚薯片叔英明，但一夜美夢過去，似乎大家都漸漸意識到六成人住公營房屋係冇乜可能。薯片叔噚日解畫話係長遠目標，但幾長遠就冇人知嘞。有網民就笑言，以薯片叔做財爺嗰時年年估錯數去推算，六成人住公營房屋應該係「百年大計」。
薯片叔前日公佈政綱，包括六成人住公營房屋嘅大計，引起唔少網民注意。不過，薯片叔喺自己facebook宣傳嘅就唔係𠵱樣，而係「協助中產置業」，又會咁得意嘅？
不過，你唔提，好多網民都已經記住，仲有人真係同你認真計吓條數添。「六成人」目標有冇可能呢？「Dixon Chow」就做咗個速算，「曾生，咪搞笑啦！6成人住公（營）屋？假設人口不增加，700萬人的6成為420萬，假設一家4口，即係需要105萬個單位，梁振英希望10年建28萬個公屋單位都未得，早知一早比（畀）你做特首啦！不過你過得到班犯（泛）民同地產商先講啦，唔好亂開支票！」
「長遠到所有人都睇唔到」
唔少人對於薯片叔以「長遠目標」4隻字嚟解畫都感到不滿，「Roger Lam」怒轟︰「有幾長有幾遠！Hea講廢話！」「Ming Yiu」就揶揄︰「長遠到現今所有人類都睇唔到嘅計劃呢。」「Eric Law」就鬧︰「長遠目標，他之後不成功不關他事，是後人無能，成功了就他英明，公佢贏，字你輸！」■記者 甘瑜