香港時間星期三下午，杜拜進行各場重要賽事抽檔儀式，呢次港隊有三駒赴會，杜拜金莎軒有大摩「新力風」及方廄「誰可拼」，另阿喬斯短途錦標有蔡約翰隻「華恩庭」，抽檔之後「新力風」得十檔，「誰可拼」抽得四檔，至於「華恩庭」抽得一檔。雖然呢次港隊派馬唔多，但唔代表冇機會揚威杜拜，好似「爪皇凌雨」嗰屆捧走司馬經典錦標咁，都係一隻單刀赴會，結果俾佢締創歷史。
據「新力風」嗰邊知情人事透露，馬主黃良柏屆時唔會赴杜拜出席盛會，只會派佢個女出席，因為佢好關心呢個周日特首選舉，希望安坐家中等結果，咁又係，馬幾時都有得跑，特首選舉，關係香港民生問題，唔止佢一個留意，相信七百幾萬香港人都好關注。大摩赴杜拜督戰，但呢個禮拜，佢在港所派出參戰馬唔少，當中仲有好多實力分子，例如「駿綵皇」及「美麗寶寶」兩匹新勝馬咁，都係有贏馬時候嘅水準，呢一類如日方中馬，如果冇乜意外，應該都係三甲穩入爭勝材，不過，大家要睇都係睇呢個馬房兩隻初出馬，分分鐘可以好似「駿皇綵」咁，一出即勝兼有好賠率，俾大家執番多少。
呢兩隻初次出賽大摩馬，分別有第二班「火箭駒」（圖214號），仲有第三班隻「確威風」，後者進度一般，反而嗰隻「火箭駒」，大家就要高度重視。「火箭駒」嚟香港前跑過八仗，得一冠四亞，贏馬路程千四米，其餘上名路程由千六米至二千，嚟香港前最後一仗是跑三歲維多利亞打吡，在去年十月中舉行，十六駒得第七名，輸俾頭馬「崇敬代表」六個餘馬位，訓練此馬嘅練馬師甘敏斯正是著名練馬師甘明斯之子。「火箭駒」由二千米跳上二千五百米出戰，依然輸唔遠，今次跑二班千六米，單跑級數，已有本錢在這一場賽事起到作用。