今個禮拜賀賢所簽嘅見習生登場，呢位潘明輝近年半喺南澳習騎，返港前在當地贏咗逾百一場頭馬，所以身手必定有番咁上下。據聞苗禮德好想簽佢，但馬會未有應承，結果搞搞吓，派咗去賀賢度，如果呢個唔係好嘢，點會有咁多練馬師吼實佢。大家可以睇睇，佢一上場除賀賢有馬提供外，大摩亦借用，仲借用三場咁多，呢三隻分別係「凱旋之星」、「銀城福星」及「花月流星」，前者仲未有賽績可跟，至於「銀城福星」上次仲跑緊第三名，呢次減十磅應該有勝機。另外隻「花月流星」，跑泥地千二米非常出色，隨時可以還我真面目。大摩向來好喜歡用初上陣嘅見習生搏馬，好似曾簽歸佢旗下嘅陳俊輝及王志偉，首次上陣就贏馬，陳俊輝贏「新力度」，王志偉就贏「陽明先鋒」，呢位潘明輝雖然唔屬大摩見習生，但咁睇得起佢，初出就俾三隻馬佢跑，當中必有筍嘢。而賀賢簽得潘明輝，相信第一日上陣亦會有好嘢益佢，呢次輝仔騎師父四隻馬，有「搵銀天皇」、「太陽喜喜」、「福愛寶」及「勤得兼備」。相信咁多隻馬點都會有一件係筍嘢，當中「福愛寶」上次由雷神披甲跑四班千四米得第二名，始終未能重啟勝門，今次升上三班跑，本身只負一一五磅列陣，但隻馬卻配十磅仔潘明輝上陣，雖然呢次初上千六米，但大家睇一睇，馬房有千四米都唔同隻馬報戰，揀千六米以輕飄飄負磅列陣必定有計，呢隻馬今次大可發揮出最佳威力贏番一場。
