■林正軒轉發游蕙禎回帶尹兆堅在前年區選時，叫「青症」、「北動」等「傘兵」讓路的說法的帖子。fb截圖所謂「槍打出頭鳥」，民主黨區議員袁海文如果學「三投黨」公民黨九龍西支部副主席、區議員余德寶咁，靜靜雞落區部署參加補選咪好好哋，係要喺傳媒面前數「青症雙邪」，結果就梗係成為眾矢之的啦！曾任「民主動力」秘書處職員嘅林正軒，為附和「雙邪」中的Cheap禎（游蕙禎），在轉發Cheap禎有關的帖子時加多句，重提民主黨當日在祥華選區「搶」咗「北區動源」個議席嗰單嘢，但就被打臉指佢連事實都搞錯。補選越近，睇怕花生一定會越來越多。
袁海文接受網媒訪問，話唔應該讓路俾Cheap禎，「議席唔屬於任何人，我睇唔到要畀返『青政』。」Cheap禎就回帶民主黨另一副主席尹兆堅在2015年區議會選舉時，指該黨暫時最少有5區將與「青症」、「北動」等「傘兵」撞區，惟「民主黨落區時間比對方長，望有關『傘兵』懸崖勒馬，以免整體『泛民』選情受影響」的言論，話袁海文「俾黨友大大力摑落去算唔算切膚之痛」，似乎係寸緊袁海文落區遲，就唔應該爭。
「傘兵」之一、「天水圍民生關注平台」召集人王百羽就留言揶揄道：「白鴿切×都唔覺得痛，點會知恥呢？」「Sharon Chan 」更質疑道：「我無論住係（喺）油尖旺或九龍城，從來都冇見過邊個民主黨（黨員）落過區。」Cheap禎就揶揄道：「賣獎券（籌款）有落架（㗎）。」
林正軒翻祥華「被搶」舊賬
現擔任社會及政治組織從業員工會理事長的林正軒，在自己的fb轉發了Cheap禎的帖子，更發文踩多民主黨一腳：「祥華條數找左（咗）未？」
在2015年區議會選舉期間，負責協調各傳統反對派政黨以免「撞區」的「民主動力」，將祥華選區當作「白區」，即無傳統反對派參選的地區，「北動」就派人落區做工夫，結果民主黨就派咗陳旭明落去選，結果雙方打大交。前者鬧過去未見過民主黨人在該區工作，並狠批對方玩針對；後者就強調該黨有在邨內開設辦事處，陳旭明一直在辦事處服務市民，曾舉辦的3次居民大會中，「北動」也有人在場，不應為選舉而講大話。
林正軒用前「民動」職員身份講嘢好似說服力都大啲，但想討Cheap禎歡心就唔該做好「fact check（事實檢查）」先啦！網民「Chapman Cheng」留言質疑道：「祥華邨不是一直有陳旭明嗎？」
林正軒聲稱：「白鴿臨提名期一兩個月先同我講有陳旭明落。而，因為之前『北動』問我拎『白區』，我比（畀）左（咗）祥華係『白區』呢個訊息佢。然後白鴿見『北動』把祥華搞得有聲有色就落人，『北動』問做乜白鴿落祥華，唔係『白區』咩，我話係咪搞錯？之後我打比（畀）某兩料議員，佢答我：佢地（哋）響機制入面咩唔響呀嘛做咩都幫佢地（哋）協調？」
「Chapman Cheng」追擊道，「北動」等「傘兵」根本沒有參與傳統反對派的協調機制，「咁（協調）機制下係陳旭明就真係冇嘢好講喎！」林正軒即稱：「冇話冇野（嘢）好講，係洗（使）橫手賤囉！」
「Chapman」發火反駁：「喂，機制係各參與黨派同意，咁跟機制行，有咩橫手？......如果這樣是『洗（使）橫手賤』，咁陳旭明落區咁耐，『傘兵』空降，利用『民主動力』資料話冇人落區，又係咩？」
唔知係咪最終衰咗拗唔贏人，林正軒發晦氣道：「此Post已完。」跟手就封咗唔畀人再留言。唉，人人都掛住「民主」個牌頭，但講到民主素養，又真係唔係個個有。 ■香港文匯報記者 羅旦