以為團結就是力量？喺反對派被法庭裁定喪失議員資格嗰6個人身上就未必。反對派之前為咗選舉明爭暗鬥鬼打鬼，不同派系結怨甚深。不過，6個宣誓「玩嘢」失去議員資格嘅反對派中人，噚日一齊開記招呼籲市民聯署，「要求還18萬選民政治權利」，結果就畀不同派系網民五花八門咁鬧爆。向來唔順眼佢哋宣誓「玩嘢」嘅網民，就鬧佢哋咎由自取；社民連梁國雄（長毛）支持者就話長毛俾班新仔連累；有人鬧「四丑」竟然俾「青症雙邪」黐埋嚟係人蠢冇藥醫；有人就鬧「四丑」之前唔幫「雙邪」，𠵱家又要合作等，呢班人可以俾人鬧嘅點真係多到數都數唔晒。
多個團體噚日開記者會，聲言反對政府「褫奪」議員資格，要求還18萬名選民政治權利咁喎。6個已經失去立法會議員資格嘅人，包括「青症雙邪」游蕙禎同梁頌恆、長毛、「香港中箭」羅冠聰、劉小麗、姚松炎，噚日更同場現身，鬧爆政府。之前一度沉寂冇人理嘅「雙邪」，噚日仲有得拎住支咪發言𠻹。
佢哋今次出嚟嘅重點，就係叫廣大市民聯署向政府施壓，仲話噚日已經有2萬人聯署喎。當然仲有呻窮啦，講吓訟費如何難以負擔。另外，游蕙禎亦乘機話，會喺上訴問題上同反對派溝通，「商討法律觀點」。
不明宣誓定義 質疑智力
有關記招噚日都有喺網上直播或流傳，雖然有佢哋嘅支持者加入鬧爆政府，但同時亦引嚟大批網民負評。向來唔順眼佢哋宣誓「玩嘢」嘅網民「Cha Cha Lam」就指出︰「20,000個簽名for（畀）邊個先？你哋每人本身係有幾萬票選出來架（㗎）嘛，4人共十幾萬啦！咁現在先得2萬個簽名，三分一都無。」「Chiupo Lini」就反問︰「十八萬人選咗班豬出嚟，能怪誰？」「Siu Jer」就話︰「一個智力正常嘅成年人係會明白宣誓嘅定義係點，當然你有權利去講任何嘢啦，但同時要自己負責返個後果，講到底，無人迫你去咁宣誓架（㗎）。」
就連反對派陣營支持者嘅留言都互相指責。「Kelvin Lam」針對班年輕人話︰「長毛真係慘，為民請命咁多年畀班新仔拖埋落水。」「Sam Lung」就針對「雙邪」留言︰「人蠢冇藥醫，黐埋兩隻鬼度做乜，方便鬼仔通風報信咩！」「Ruby Chiu」亦話︰「好傻瓜，有無想過嗰2個二五仔會leak out your defense strategy（洩露你嘅辯護策略）？ 」「Dickson Yun」更鬧道︰「搵鬼上身。」
不過，亦有人針對「四丑」覺得佢哋利用人。「Connie Tse」就話︰「還十八萬選民的權利，但眾籌就只係4個『DQ議員』，有着數時就4個，有利用價值時就6個，真係好公義哦。」「Winnie Ng」亦話︰「之前又唔見你們聲援梁游，現在自己做錯事，又想一起合作幫忙，你認為有用嗎？」「Cha Cha Lam 」就醒起劉小麗大把錢唔使人幫，留言問︰「小麗老千按晒啲樓未？」 ■香港文匯報記者 甘瑜