■譚文豪俾網民寸到冇聲出。 譚文豪fb截圖為咗唱衰高鐵嘅「一地兩檢」，反對派可以去到幾盡？公民黨立法會議員、飛機師譚文豪就決定搭高鐵扮專家，前晚深夜喺facebook發佈一段所謂「實測」片，以為佢有咩驚人發現，原來係比較喺深圳搭高鐵轉車去廣州東站，同喺廣州東站直接搭和諧號去深圳邊個快啲，咁當然係後者快啲啦。有網民都忍不住留言寸佢︰「邊有理由只比較去東站既（嘅）時間咁屈機。 等於比較香港過九龍時間，但只計去西隧出口九龍站時間，咁當然得西隧合理。東隧炸左（咗）佢得啦。但過海唔係只去九龍站。廣州市亦唔係得天河北一個市中心。」
亂比高鐵和諧號 唔識用App買飛
譚文豪前晚喺fb貼咗段片力踩高鐵搵笨。佢話，自己由深圳福田出發，排咗成半個鐘隊先買到飛，仲要係得企位冇坐位，要去到偏僻嘅番禺再轉車，總共要95分鐘。之後佢就聲稱用「正常香港人來回廣州嘅方法」，搭返和諧號返羅湖，只係用咗78分鐘啫，結論就係高鐵搵人笨，真係開心大發現啊，連佢嘅支持者都話︰「先唔理有無point。拍得好用心。」
不過，好多網民已經喺囥O段描述度搵到N個「吐槽點」。首先就係佢呻嘅排隊問題，「張亦霖」就直接話「係妳（你）豬先會排隊買票」，仲話其實有App可以買飛，唔少網民都留言認同。「Ronald Lam」亦表示︰「有『一地兩檢』之後，就已經唔需要響福田站排隊30分鐘購票。」
其次就係鬧佢嘅比較偏頗，「George Mak」就話︰「去廣州東站就當然搭返東鐵啦。 但去廣州交易會場，東站南站坐的士就差唔夠十分鐘。 去港人熟悉既（嘅）白天鵝上下九路步行街，車程無分別。去河南區更係南站近。邊有理由只比較去東站既（嘅）時間咁屈機。 」「Chung Chung Cheung」亦話︰「最on（戇）×既（嘅）係，竟然選搭高鐵去廣州市中心，而唔搭和諧號，自己搭錯車，然後走去鬧人。」
齋搭去廣州 短視唔熟書
有人就笑譚文豪短視。「Ann Tang」就話︰「覺得撘（搭）高鐵的只去到廣州，目光真係短淺，亦証（證）明你根本對內地交通網絡不熟識！南站可轉乘到其他的地方好多呢！」「Wai Yee Lau」亦表示︰「係囉，講來講去都係去廣州，我重（仲）以為廣州係終點站㖭。」
有唔少人嘅留言就突破盲腸。「Ming Ma」就揶揄︰「廣洲（州）南咁偏僻都多人到得企位......？」「Joshua Fong」亦話︰「成件事最離奇係你上到大陸（內地）。」「John Common」就表示︰「你嘅邏輯係因為高鐵唔係想像中咁快，所以我哋唔差在再阻一阻佢。」 ■香港文匯報記者 甘瑜