反對派成日喺立法會拉布，財委會更係拉到冇得撥款咁滯，唔少人都認為要撥亂反正。財委會主席波哥（陳健波）早前就建議修改財委會議事規則，反對派即刻發茅反攻。不過，波哥並無因此動搖，噚日仲喺facebook發佈短片舌戰「群愚」，逐個點名反駁，有網民留言激讚︰「波哥，你的道理實實在在，一定支持你。」
反對派未睇文件就反對
波哥喺影片一開頭先嚟個「AOE（大範圍攻擊）」，話佢嘅修訂建議文件仲未完成，反對派未睇就反對，證明佢哋唔敢面對拉布禍港嘅事實。第一個被波哥點名批評嘅係「自決派」朱凱廸，佢批評波哥嘅建議會「削弱財委會監察權力」，波哥直言，拉布時間少咗，就會有多啲時間問問題，又點會削弱監察呢？
第二個被點名嘅係民主黨胡志偉，同樣話拉布可以「監察」政府，波哥就直指拉布只係拖延政府施政，並反駁「主席權力太大」嘅講法話︰「最多只係議員拉布嘅權小咗，主席嘅權冇變大到。」波哥仲話，財委會唔係反對派改變選舉制度嘅地方，要爭取就去大會，唔好政治凌駕民生。
楊岳橋唔知財會不分組點票
至於公民黨黨魁楊岳橋話波哥乘人之危，趁反對派少人，所以分組點票容易通過修改議事規則建議，波哥無奈表示楊岳橋連事實都搞錯，直言財委會從來唔使分組點票，不嬲都係過半數就通過。
波哥最後話，如果修改議事規則嘅建議係冇道理，建制派投票通過後都會面對市民嘅政治後果，「講到尾，財委會係撥款民生、發展香港嘅重要場地，所以一定要撥亂反正，頂住壓力，勇往直前。」
唔少網民都留言支持波哥。「Dan Young」就話：「波哥，你講的全部都中，照做啦。你講乜佢哋都有無厘頭意見反對。」「Wing Hie Lee」亦話︰「『犯（泛）民』離經背（叛）道與民為敵，確彻（切）支持波哥撥亂反正，恢復議會正常運作！」■香港文匯報記者 鄭治祖