■Cheap禎張圖配埋篇《陳情表》文，真係正宗嘅圖文不符。「青症雙邪」之一嘅游蕙禎（Cheap禎）玩完，唔單止失去立法會議員資格，仲面臨破產，補選都好大機會無緣。前日佢就「痛定思痛」，喺facebook出咗篇《陳情表》，話有好多「感謝和抱歉」，對投票畀自己嘅人都難辭其咎咁話。佢仲話會檢視「過去自身的窘態」，仲話「回首昨日的驕奢躁進，確實汗顏，但這是自己種下的因，結的果要由自己品嚐。」似乎睇嘢成熟咗喎！但網民又邊有咁易呃啊，有人就留言話︰「道歉？唔覺喎，究竟係想對咩人道歉呀？......睇唔到你對宣誓上爆粗有任何內疚。......個人既（嘅）估計就係，你（嘅）『道歉』係向無鬧你既（嘅）人講，換句話說即係『博同情』。」 ■香港文匯報記者 甘瑜
Cheap禎喺篇文度懶晒有反省咁話自己對於被DQ（取消議員資格）一事覺得「萬分愧疚」，一嚟冇得畀自己班議助「一展所長」，二嚟係自己「失去在議會的發言權」，對唔住投票畀佢嘅市民咁喎。佢又話，「我的一蹶不振稚嫩得可笑」、「覺得自己除了繼續爭回議席，已無事可做，無用武之地，實際上是可恥地推卸責任」，仲話以後會逐項推進需要實踐嘅事，「我必然要痛省昨日之非，再以不同的角色和崗位拾道而行。」
睇落去比起以前一味鬧特區政府唔啱係成熟咗嘅，都有唔少支持者畀like支持，但亦有好多網民冇因為佢嘅花言巧語而收貨。「Ping KT」就直言︰「道歉？唔覺喎，究竟係想對咩人道歉呀？依（𠵱）件事只有兩班人，鬧你宣誓上爆粗既（嘅）人（包括我），同無鬧你既（嘅）人。首先，鬧你既（嘅）人，就你編（篇）文中，睇唔到你對宣誓上爆粗有任何內疚。當然，或者你所講既（嘅）道歉可能根本就唔係指依（𠵱）件事。其次，對於個（嗰）班無鬧你既（嘅）人黎（嚟）講，佢地（哋）又無鬧你又無××你，咁你又道乜×歉呢？個人既（嘅）估計就係，你（嘅）『道歉』係向無鬧你既（嘅）人講，換句話說即係『博同情』。」
賴賬零擔當 網民：找咗條數先
「Anita Lam」亦話︰「早知今日何必當初，若真係為咗香港市民著（着）想，請檢討你們的所作所為，......請不要將責任推給社會、政府及市民， 請好好反省自己檢討你是否有做錯 ！」「Alif Lau」亦話︰「宣誓不能玩，是世界公認的常識，可見你思想未成熟，只顧當時型，不深思後果，係你畀位人入。自己做錯唔好博同情博略（掠）水。」「Tsang Mu」就話︰「蔽（撇）開政治上問題，就你用辱華詞語一事，對戰爭中受難者同我哋受過苦難嘅長輩不敬仍欠一個真誠嘅道歉！你再寫多10萬篇廢文都無用，你已經無資格喊去為人做事，因為你連做人嘅資格都無！」
更加多人對Cheap禎賴賬不滿。「Chan Cherry」表示︰「其實在某媒體睇到你的偉論，表示大不了便破產，我真係睇到O哂咀（晒嘴）。游小姐，你真金白銀洗（使）左（咗）納稅人幾百萬，之後一個華麗轉身表示唔還同破產 ，我好慶幸無投票 ， 好慶幸你無當選。因為香港係需要一個有擔當、負責任既（嘅）議員。」「Po Tai」就話︰「唔好扯開話題喇，找咗條數先！」
「Doris Choi」就認為佢不如同「瀆誓四丑」道歉︰「原本你地（哋）兩個肯認錯就無事，點知玩串個party，既唔熟議事規則又唔熟基本法就衝出黎（嚟）俾人DQ，難為其他至少有學識有做事既（嘅）議員俾你地（哋）兩位連累。」