■網民以設計對白嘲笑小麗老千。 網上截圖「瀆誓四丑」被法庭裁定喪失立法會議員資格，隨即出嚟呻窮眾籌，連有兩層樓喺手、之前俾人追捐款數都不了了之嘅小麗老千（劉小麗）亦唔例外，由8月1日至今最少已經舉行咗超過20次公開籌款，次次都講到自己「一窮二白」要市民打救，但轉頭竟然同男性友人去台灣墾丁沙灘拖手玩樂。唔少網民對此都深感憤怒，狠批小麗老千「帶著（着）捐款去旅行」、「去旅行去到盡」，提醒佢要記得「找數」。■香港文匯報記者 鄭治祖
今年7月被取消立法會議員資格嘅小麗老千，心情似乎未有受到影響。香港有傳媒噚日就報道，劉小麗同一名男子在台灣墾丁沙灘拖手玩樂，兩人親暱猶如情侶，睇到網民眼火都爆。
口講「一窮二白」 擁最少兩物業
點解？唔係妒忌小麗老千疑似有拖拍嘅「去死去死」心態，而係因為小麗老千過去經常呻窮，頻頻落區又喺網上呼籲支持者捐款，次次都講到自己「一窮二白」要市民打救。香港文匯報早前都揭露過，根據「田土廳」（土地註冊處）的資料顯示，其實小麗老千係「千萬富婆」，最少擁有兩個私人物業，一個喺新界，一個喺九龍自住，有錢過唔少向佢捐錢嘅香港市民。
此外，根據香港文匯報記者7月底連續多日觀察，劉小麗每次一出家門就截的士，長途過海都照坐，由屋企行5分鐘去地鐵站搭下地鐵慳下錢都冇。咁又係，平時咁大使，市民唔捐下錢又點夠用？
「叫人捐錢，原來係遊埠」
不過，竟然一邊呻窮再一邊旅行，網民今次就真係頂佢唔順啦。網上即刻罵聲一片。「Anthony Ng」就話：「 嘩！日日响街扮死狗叫人捐錢，原來係俾（畀）佢去遊埠。」「Jimmy Tsang」就揶揄：「 好浪『慢』啊，請記得用宣誓時的龜速一步一步在沙灘『慢』步呀！」「fff888」亦曲線表示：「籌完款梗係去旅行去到盡。」「DemonGod」直揭瘡疤話：「傻仔捐錢，老千收錢溝仔去旅行。」
另外，由於早前旺角暴亂案一名女被告疑棄保潛逃台灣尋求「庇護」，「愛1c蛋」就話擔心小麗老千「好似旺暴女咁留起（喺）台灣唔返香港走數。」
人哋冇議席就落魄，你就春風滿面仲有得見報，唔少人當然好葡萄。「城邦派國師」傻根（陳云根）喺facebook發帖稱：「『老母』（有網民戲稱小麗老千做小麗老母）年輕化，準備接班游（蕙禎）小姐，各位『波皮黨』，補選準備投票給美少女啦。」
「香港民族黨」召集人陳浩天也稱：「劉小麗去台灣拍拖都要俾人跟蹤，痴線。久旱逢甘露又好，食臘腸又好，攝灶罅都好，其實都唔係好關你事，除非你想追佢啦......」