■梁頌恆與游蕙禎被指疑秘密同居。 資料圖片喺今年4月嘅一個早晨，當差人去到「青症雙邪」Cheap禎（游蕙禎）喺灣仔嘅住所，以涉嫌喺立法會大樓非法集結拉佢嘅時候，點會估到一箭雙雕，喺同一幢大廈連的士梁（梁頌恆）都拉埋？而的士梁當時仲要赤住腳走上天台，令人懷疑係男方鞋都着唔切拔足逃離女方香閨！喺4個月之後，男方終於回應呢單嘢，話自己前一晚傾傾吓官司傾到醉咗，喺女方天台度借宿一宵，但強調係「攬住自己瞓」。不過，傾官司係正正經經嘅事，搞乜會飲到醉晒，仲醉到上天台？
有周刊噚日喺網上上載咗梁游嘅訪問，的士梁首次回應自己做咗「天台上的男人」單嘢，話自己當日係喺Cheap禎天台度飲醉咗「攬住自己瞓緊覺」，因為前一晚佢哋同律師傾緊司法程序嘅嘢，「大家傾住就飲酒啦，（之後）眼瞓，咁佢哋就走咗啦，咁我喺度攬住咗自己瞓着咗啦，佢（Cheap禎）就唔知幾時落咗去瞓。」
政圈一直盛傳佢兩個喺埋一齊，仲喺立法會附近共築愛巢，即係差人去拉佢哋嘅單位。報道話Cheap禎聽完之後即刻鄙視的士梁，的士梁就話同女友「感情穩定」。Cheap禎仲死撐點解係一男一女先會傳花邊新聞，「好似我之前黃埔區選，嗰陣同阿葆（退出咗『青症』嘅鄺葆賢）又係經常一pair（對）咁出現，點解無人傳我同阿葆有嘢？」
網民唔信冇嘢：轉行做演員
你有你4個月後先提供解釋，網民都繼續保持原有睇法。「Mcqueen Ho」就留言問︰「你真係信佢哋只係戰友？共處一室，女嘅換衫出嚟，前後腳入女方住所幾個鐘，不如佢哋轉行做演員啦。」咦？好似有得諗喎，反正做唔成議員。 ■香港文匯報記者 陳庭佳