■江若琳和男友蕭潤邦大跳辣身舞。香港文匯報訊（記者 植植）江若琳（Elanne）的一連兩場「我只不過是江若琳演唱會」前晚於九展開鑼，換上白色透視性感裙的Elanne除鞋赤腳孖男朋友蕭潤邦（Oscar）一齊跳《One and Only》，兩人跳舞期間有不少親密動作，其後Oscar就抱起江若琳轉圈，兩人再十指緊扣行返後台，十分Sweet。
江若琳前晚於九展開騷，偶像周慧敏因為要做李克勤演唱會嘉賓，未能現身，但仍送上花籃支持。不少圈中朋友都有拍片支持佢，好似有鍾舒漫、洪卓立、Hotcha、周柏豪、陳柏宇、小肥等，周柏豪話：「佢份人好有義氣，又好錫屋企人，個人冇乜所謂，我仲拍過佢個MV，佢係第一個搞我腳趾的人。」洪卓立踢爆Oscar追Elanne，他說：「𠵱家終於明白點解嗰時成日約食飯，𠵱家再冇約食飯。」小肥就話：「江若琳係一個粗人，但我會叫佢大佬。當日飯局得我同佢、Oscar，之後2人在我面前咀嘴，原來係想話我知他們拍拖。」
跌入谷底時分清真朋友
演唱會上，穿上連身白色裙的Elanne邊彈邊唱《Blowing in the wind》揭序幕，Elanne感激大家支持，她說：「今晚台上我唔係江若琳、係大家嘅舊朋友，今晚帶大家回憶十年前的種種。」隨即唱出《撒嬌》。之後不避嫌唱出男友蕭潤邦的《背上的肖象》，之後再換上白色透視性感Look孖男友跳舞，現場播放《One & Only》音樂襯托兩人，中途Osacr伸手摸女友手及大髀內側，Elanne更瞓在男友大髀上，最後Oscar索性舉高女友，之後兩人十指緊扣行返後台。Encore時，穿上露臍裝的Elanne在觀眾席出現，邊唱邊與歌迷握手，Elanne表示深深明白「錦上添花」四字的意思，她說：「當成績好就好多朋友，到我跌入谷底時沒有朋友，有個我自以為朋友的人，我有事時佢同記者講『我同佢唔熟，有咩問番我』，幸好𠵱家都有真心朋友。」