反對派各門各路就明年3月立法會補選水花四濺，不過就係口水，大家都係喺傳媒或者網上抬高自己、踩低人哋。到咗噚日，卒之有啲實質嘢出嚟，有網媒報稱攞到反對派草擬本，當中提到會喺九龍西同新界東兩區做初選，每區分別有5個同4個人報名。喺焦點所在嘅九西，除咗民主黨、民協、聲稱唔係「青症雙邪」Cheap禎（游蕙禎）替身嘅袁健恩之外，仲有「佔領」期間襲警罪成判監嘅曾健超，但就唔見被DQ（取消議員資格）但等候上訴嘅小麗老千（劉小麗）。網上班花生友當兩個老牌政黨無到，一啲話曾健超搶小麗老千飯碗，一啲就話以後都唔信「青症」，更有人對住幾件爛橙揀唔落手，大嘆「有冇啲正常啲㗎？」
噚日有網媒報稱攞到負責協調反對派嘅「民主動力」草擬嘅備忘錄，入面提到收到5份參與九西初選嘅報名，來自民主黨深水埗區議員美容袁（袁海文）、民協「facebook管理員」馮檢基、袁健恩、曾健超同埋身兼社民連成員嘅「社會主義行動」主席鄧美晶。新東就收到4份，分別係前「學民思潮」發言人張秀賢、「新民主同盟」咖哩飯（范國威）、前立法會議員鄭家富同埋民主黨大埔區議員區鎮樺。
九西新東分餅 「承諾」唔賴皮
至於初選點玩，備忘錄話會先喺下月初做電話調查，訪問約800個九西選民同1,200個新東選民，亦都會喺電子投票平台收集意見，下年1月中就會搞埋實體票站，最後計吓邊個高分，就會代表反對派出選。如果勝出者過唔到確認書一關，就會由排第二或第三嘅人頂上。
「民主動力」仲有一份「參選承諾書」，要求參與初選者輸咗唔准賴皮，承諾唔會成為官方候選人，而且要支持勝出初選者，唔准支持其他人，各人要喺今個月底前交返「承諾書」。
至於初選條數點計，「民主動力」就估計涉及約55萬元，扣除各方捐贈，如果有6個參選人，每人就要分擔最高8萬元，仲要係初選前即磅嗰隻，同時提醒即使參選人唔喺正式選舉去馬，都要向選舉事務處申報有關開支同捐贈。
不過，「民主動力」無提到港島補選嘅初選做法，似乎係為「中箭」（「香港眾志」）永續港島議席鋪平條路嘞。
曾健超反口起「老千」尾注
曾健超入冊前話無興趣參加補選，出冊後改口風話積極考慮，𠵱家仲據報報埋名玩初選，有網民不滿佢對光譜相近嘅小麗老千起尾注。「Peter Wong」質疑佢唔理政治倫理；「Mak Jolene」更加寸佢撩事鬥非之後有社工局保佢，「若今次都選唔到，咁佢就真係極廢。」袁健恩亦都因為有Cheap禎獻上死亡之吻而備受批評，「Jason Diaz Napoleon」就睇死今次「青症」鎅唔到票，疑似苦主嘅「Eliza Yeung」更話唔會再信「青症」。
亦有口痕友覺得成件事係廢鬥廢。「Mike Yeung」話曾健超同袁健恩之間，兩「健」都揀唔落手。「Nasa Ho」就仲抵死：「有冇啲正常啲㗎？」 ■香港文匯報記者 陳庭佳