■張建宗和劉鳴煒做出大熱韓風手勢，表明要將青年意見好好收藏。 短片截圖除咗上電台介紹之外，劉鳴煒仲同政務司司長張建宗拍攝短片，介紹「青年委員自薦試行計劃」，佢哋更加韓國男團上身，做出大熱手勢，表明要將青年意見收藏喺心入面。
男團手勢宣傳自薦計劃
民政事務局facebook專頁日前上載一條短片，司長喺片入面提到特區政府會與青年同行，鼓勵佢哋議政論政，鳴煒當然舉腳贊成啦，之後兩個人就介紹今次呢個計劃，當佢哋講到「畀我哋聽取你嘅意見」呢句時，更加用雙手拇指同食指做出手勢，表明要將青年意見好好收藏。
呢個手勢由韓國男團Wanna One自創，代表「在我心裡收藏」，司長同鳴煒真係食正韓風。以為咁就完？鳴煒最後扶住張櫈，問到有興趣嘅青年「Wanna one（要一個嗎）？」司長就接住落：「我哋等你埋位！」■香港文匯報記者 鄭治祖