林 作
無論係由「型到震」的三哥苗僑偉主演嘅《使徒行者2》，定係有香港人好熟識嘅山雞......喺鳳凰哥嘅《反黑》，都係近年香港少見高質素嘅電視劇。兩套劇集係差唔多時間同時結束，又無差唔多水準嘅劇集去承接，相信會令好多觀眾有種若有所失的感覺。喺呢度向大家推薦一下Netflix（神劇大本營）最近播放嘅《Mindhunter》及《怪奇物語2》（Stranger Things 2），十分高質素，令我睇到欲罷不能。
不過呢啲都唔係今日嘅重點。唔知大家有無留意，港產片或者劇集，稍為有口碑的通常都係警匪片。OK，可能仲有少少宮廷片或者大家族爭家產的，重點係，香港拿手拍嘅片種實在太狹窄。唔好講電影，單以劇集去計，甚至單講美國劇集，有講政治嘅神劇《House of Cards》，有關犯罪刺激嘅《Breaking Bad》，有關科技幻想世界嘅《Westworld》，有關反烏托邦嘅《Handmaid's Tale》，更唔好提神劇中的神劇屬於史詩式嘅《權力的遊戲》（Game of Thrones）。基本上，美國喺各種各樣嘅主題上都可以拍出絕佳的作品，香 港 絕 對 係相形見 絀。The Question Is, Why？
《警察故事》、《新警察故事》、《無間道》、《寒戰》......呢類嘅警匪動作片都喺香港獲得極好的票房，可以話已經變咗一個Comfort Zone。劇又好戲又好，只要跟返住條Form，來來去去都係臥底、槍戰，然後喺香港光天化日之下又AK又C4咁平日見唔到嘅場面，觀眾就會受落。如果拍一啲比較少見嘅題材，又驚觀眾唔受落無收視（乜乜高倫布，張保仔等等），結果劇集題材就逐漸變得單一化。
作為一個觀眾，其實我最想見到嘅係一啲有新鮮感嘅劇集。對上一套令我有呢種感覺嘅港產劇集已經係《EU超時任務》，嗰種無限輪迴的以及蝴蝶效應的概念，令我諗起湯告魯斯（Tom Cruise）嘅《Edge of tomorrow》及艾斯頓傑查（Aston Kutcher）嘅《The Butterly Effect》。
而家特首話要搞創新，我希望影視界都好好搞下創新，嘗試下拍各種各樣題嘅作品，唔好再故步自封留喺自己嘅Comfort Zone，話唔定可以重新振興返傳統電視頻道以及本土電影業。