■林卓廷「成功爭取」搬走電話亭，仲以為巧威威四處轉發，被街坊點名鬧爆。fb截圖建制派為街坊做到嘢時，反對派就葡萄話人「成功爭取」，但你估「成功爭取」真係咁易呀！民主黨新界東立法會議員林卓廷，近日就喺fb發帖話龍豐花園對開行人路非常狹窄，佢已經「成功爭取」電訊盈科應承搬遷路上嘅電話亭喎。此帖一出，當區居民都好憤怒囉，話行人路狹窄係因為有商舖違規將貨物放出行人路，仲有水貨客即場執貨，林卓廷唔要求政府加強執法反而本末倒置搬走個電話亭，鬧佢無腦，有人仲揶揄話林卓廷擺街站仲阻街，希望佢跟進喎！
林卓廷前日喺fb發帖，話上水龍豐花園A座對出近智昌路的行人路非常狹窄，人流極高，加上有商戶擺賣，造成阻塞，而該處設有「電訊盈科」電話亭，形成樽頸位置，令問題雪上加霜，所以佢自上任後就一直要求對方搬走個電話亭嚟「擴闊行人路」，在斡旋後對方終答應移除該電話亭，預計需時4個月到5個月喎。
認叻被斥「點解搬走便民裝置」
佢可能覺得今次「成功爭取」巧威威，所以除咗喺自己fb發帖外，仲主動將該帖子轉發到有好多區內街坊睇嘅「North District 北區」同「上水人大聯盟」群組，諗住領功。不過，當區居民嘅反應，就似乎唔多好噃！
「Priscilla Wong」就留言道：「其實，係唔係要商戶唔好霸佔公眾地方比較合理？搬左（咗）個電話亭，啲商戶咪又係霸埋佢？」
「Kouji Keith Ichii」更狠批道：「 點解d（啲）議員可以咁×本末倒置既（嘅）？問題出於檔口擺×到大半條街咁出，（林卓廷）又吳（唔）叫食環出傳票，反為要叫人搬走1個便民裝置？」
網民：成事不足 衝出嚟蠢
「Fat Ha NG」也說：「關個電話亭乜事 ？水貨客太多喇，檔主又將貨品擺出行人路，唔通第日再迫D（啲）連條馬路都封咗夆筑I大賣場咩？」「Jason Wong」道：「電話亭係公共設施，點解會阻街？呢位議員唔該用下腦做嘢。你睇下龍豐對開嘅水貨客喼陣阻街D（啲），定係個電話亭阻街？北區其實大把社區問題重要過個電話亭，唔該俾（畀）D（啲）心去落區做下嘢。」
有唔少人更恥笑林卓廷以為自己真係「成功爭取」。「Waihang Iu」道：「做×事唔緊要，但你唔好衝出黎（嚟）×吖嘛，大佬！仲要自己分享過黎（嚟），你唔係仲想領功當政績吓嘛？」「Jessica So」也道：「明明做咗嘅（啲）唔合理又無腦嘅嘢，都仲同圍post諗住邀工（功）？好明顯你只係公告天下話比（畀）人知，你係幾咁白痴無腦九唔搭八！」
■香港文匯報記者 羅旦