林 作
講了兩期嘅嚴肅話題，所以今個禮拜會寫返啲比較輕鬆嘅文章。順帶一提，之前有讀者問過我，點解我嘅文章一時係書面語一時就白話文，到底係咪有兩個作者去寫呢個專欄。其實，白話文係我，書面語都係我，至於點樣決定去用邊種？哈哈，純粹睇心情。
話說我有個女性朋友，最近有情人終成眷屬，成功搵到個男朋友。本來係一件好事，但係之後發生一啲意想唔到嘅事令佢哭笑不得心煩意亂。事緣當佢喺facebook公開戀情幾日之後，突然收到一位之前曾經同佢約會咗幾次嘅男仔嘅一束花以及一封情信。信中內容......有點兒肉麻，而且就咁公開都好似唔係咁好，所以都只係挑重點講。大意係個男仔唔想無咗呢個朋友，甚至話一旦佢回復單身就要做佢嘅男朋友，最後仲以一首詩以及祝佢永遠幸福快樂作結尾。信中情意綿綿，令人以為多情公子侯希白穿越嚟咗現代。
問題係：你同人哋只係出咗幾次街，做乜已經好似要山盟海誓咁？Come On！人生三大錯覺之一，我鍾意嘅女仔其實都鍾意我。好多情竇初開嘅小男生，同心儀嘅女仔出幾次街就覺得人哋一定係鍾意自己所以先肯出嚟約會。但實情係女生可能係對你有些少興趣，約會只係考驗吓你睇吓適唔適合。所以好多時候約會幾次之後女生突然不瞅不睬，令男生摸不着頭腦，其實係因為男生已經喺約會中唔合格，「You are fired」。
唔合格嘅原因有好多種，但最常見嘅係對個女仔太好。請注意，唔係話唔應該對女仔好，而係首先，人哋都未係你女朋友，你對個女仔咁好反而會俾咗啲不必要嘅壓力對方，好似已經要人去Commit落呢段感情裡面，衰咗。其次，愛情係俾鍊金術（化學）更深奧嘅存在，並沒有等價交換，你對人好人哋無需要對返你好。一個常見嘅謬誤，追女仔就係要對人好，錯錯錯！男女感情就好似一場博弈，你擺明車馬去追人，就好似打開底牌同人玩Showhand，輸硬。唔係話暖男無市場，但係男女之間嘅吸引力係在於神秘感以及魅力。當你成功令個女仔估你唔透，產生到「到底佢係咪想追求我呢」嘅感覺，偶然間諗起你，諗多幾次可能就會將你嘅身影記入腦海。限於篇幅不能講太詳盡，但歡迎大家私訊同我討論下，應該會係我最有興趣嘅話題，哈哈。