林 作
執筆之日睇新聞，望到國務院公佈免去林武的中聯辦副主任職務，勾起咗我一啲回憶。熟悉我嘅人應該知道我曾經選過鑽石山嘅區議員，而林武呢個名就係嗰陣時同我扯上關係。
咁實情我哋有咩關係？其實，林武係林作嘅親生老竇......係呀！呢個消息當時喺網上好多人傳㗎。事緣某日我喺街上面派緊政綱傳單，有位陌生男士走上嚟同我傾偈，講下關於該區嘅民生。過咗幾日，我同嗰位男士交談嘅相就喺網上流傳，標題係「中聯辦副主任林武派司機嚟同林作傳話」！喂喂喂，求其一個人就可以話係林武司機㗎啦！就算真係要搵人嚟見我，都唔係日光日白嚟搵我畀人影啦！同埋家陣咁嘅年代，傳話用電話就可以，使乜搞咁大陣仗！
遺憾嘅係，即使件事咁多疑點仍然好多人相信。傳下傳下，竟然最後變成林武係我老竇，當時真係差啲笑死我。其實當時我嘅一位對手係激進「泛民人士」，所以呢種「老屈」我係咩中央派落去空降嘅消息喺選舉嗰陣可以話每隔幾日又會有一單新嘅出現。眾口鑠金，曾參殺人，傳下傳下我就畀人Label咗為建制派人士，哈哈。
網絡世界愈來愈發達，消息傳播得愈來愈遠同埋愈快。後真相年代（Post Truth），即係指𠵱家好多人無視事情嘅真偽，只喺找住機會去發佈一啲包裝過嘅消息從而使自己獲利，呢種行為喺選舉嘅時候會特別多，上年嘅美國大選就係好好嘅例子。
幾個月後就係立法會補選，相信大家又會聽到某某候選人嚟鎅票，邊個邊個又係中央派嚟。
希望到時大家唔好淨係用眼同埋耳，而係親身去見見候選人，用心感受一下以及去翻查一下候選人以往所做以及所講過嘅嘢，去真正認識佢，然後去選出一個真正為香港為市民發聲嘅代議士。