周庭去年唔認自己係中國人，原來佢當時有英國籍！不過，為咗攞每個月十幾萬薪津，佢又變返中國人身份啦！周庭噚日報名參加港島區補選時，就展示咗自己放棄英籍嘅「證明文件」。不過，根據英國內政部文件，即使放棄英籍，仍有一次恢復嘅權利喎！
周庭放棄英籍，喺崇英L眼中好似好大犧牲咁，但事實上，根據英國內政部一份名為「已聲明放棄英國公民身份者申請登記成為英國公民（Application for registration as a British citizen by a person who has made a declaration of renunciation）」嘅指引，為保留或取得其他公民身份而放棄英籍者，有再加入英籍嘅權利一次。換言之，周庭仍保留做「英國人」嘅權利。
唔少網民都挑通眼眉。「Ho Cheuk Him」就話：「放棄英藉（籍）有幾大犧牲？ 就算放棄咗可以有一次機會恢復英藉（籍），做唔成政棍都仲有後路可以行，香港畀佢哋玩爛咗就番（返）唔到轉頭，唔該唔好講到佢哋係聖人！」
「Tsang Edward」則寸道：「英籍不值錢，立法會議員底薪十萬，當然要放棄。」「Wing Hong Peter Wong」質疑：「講吓唔洗（使）咁認真，之前好多人都話放棄嗰d（啲），不如搵記者跟跟有冇先啦！」■香港文匯報記者 鄭治祖