本港樓市近年只升不跌，基本上你聽到的升市理由，不外乎供不應求、低息環境和北水南調等，但王祖安有一個更宏觀的看法：「通貨膨脹，你息口就要升，因為要打壓呢樣嘢，雖然科技發展的確搶走咗一啲工種，但亦同樣優化一啲嘢，一優化就即係將成本壓落去，咁你就無通貨膨脹，息口就唔使升咁多。」他笑說：「AI發展其實間接幫緊香港樓市。」
AI助降物價 升息速度減
王祖安認為，香港樓市近年之所以急升，最主要原因是息口低，息口低又與全球近年科技超速發展有關：「𠵱家科技公司的產品其實係輸出緊通貨貶值，阿里巴巴嘅淘寶就是一個很好的例子，佢取代咗中間人，件貨物就無咁貴，當通貨膨脹細咗，息口就唔會好似以前百分之十幾咁高。不過無人Quantify（量化）過呢樣嘢影響有幾大。」
「喺我眼中，香港樓市某程度係得益於矽谷嘅創新。」他曾聽身邊一位成功的創業家說過，以前要請5位秘書幫忙，但今日只需1個智能電話及1位秘書，少請4個人。至於現在開網店的成本低，又有手機應用程式（Apps）這類生意平台：「𠵱家在美國開一間科技公司，（成本）由以前4萬美元縮到4,000美元，所以咪咁多人創業囉，因為成本跌咗好多。呢啲嘢其實同息口、樓市全部都連繫埋一齊。」
科技發展迅速，不少工種未來陸續被機械取代，王祖安希望能從事一個不會被淘汰的行業：「我希望做一樣嘢，係科技唔會淘汰我。科技係我嘅朋友，如果科技可以淘汰我，我覺得呢樣嘢係好恐怖；我覺得科技係淘汰唔到地產。」